Sot në mbrëmje do të kompletohet faza çerekfinale e Ligës së Kampionëve, pasi do të mësohen edhe dy skuadrat e fundit që do të avancojnë nga 1/8 e finales.
Megjithatë, dueli më interesant i mbrëmjes, do të luhet në stadiumin “Wanda Metropolitano” në Madrid prej orës 21:00, ku Atletico e pret skuadrën e Interit.
Atletico Madridi futet i motivuar në këtë ndeshje për ta përmbysur rezultatin e ndeshjes së parë dhe për ta eliminuar Interin, i cili është nënkampion në fuqi i Evropës. Në duelin e parë të luajtur në Itali më datën 20 mars, Interi triumfoi me rezultatin 1:0, falë golit të Marko Arnautoviqit në fund të takimit.
Po ashtu, Atletico në këtë takim vjen pas humbjes shokuese në La Liga, ku pësoi nga skuadra e Cadizit 2:0. Megjithatë, trajneri Diego Simeone pritet t’i ketë në dispozicion të gjithë futbollistët, përfshirë edhe sulmuesin Antoine Griezmann, i cili mungoi në ndeshjen e parë në Itali.
Edhe Interi do të jetë i kompletuar dhe për dallim prej Atleticos ka formë më të mirë pasi i ka fituar 13 ndeshjet e fundit në të gjitha garat.
Po ashtu, në të njëjtën kohë do të luhet edhe dueli Borussia Dortmundit dhe PSV Eindhovenit që gjithashtu do të jetë interesant. Në duelin e parë në Holandë, rezultati ishte 1:1 dhe tani gjithçka do të vendoset në Gjermani.
