Raporti i Agjencisë të Inteligjencës së Shteteve të Bashkuara, parashikon se gjatë vitit 2024, rajoni i Ballkanit Perëndimor mund të përballet me konflikte etnike. Në këtë raport përmenden edhe tensionet e vitit të kaluar në veriun e Kosovës që kulmuan me sulmin terrorist në Banjskë të Zveçanit. Analisti politik, Ognjen Gogiq thotë për tëvë1 se ekziston një mosbesim i thellë mes dy komuniteteve, andaj tensionet sipas tij nuk mund të përjashtohen.
Gjatë vitit 2024, Ballkani mund të përballet me konflikte etnike.
Kështu thuhet në raportin e Agjencisë të Inteligjencës së Shteteve të Bashkuara, ku një pjesë e rëndësishme i kushtohet rajonit të Ballkanit Perëndimor.
“Liderët nacionalistë ka shumë të ngjarë t’i acarojnë tensionet për përfitime politike, ndërsa aktorët e jashtëm do t’i shfrytëzojnë dallimet etnike për ta rritur apo mbrojtur ndikimin e vet rajonal, apo për të mos e lejuar integrimin më të madh të Ballkanit në institucionet euroatlantike dhe të Bashkimit Evropian” thuhet ndër të tjera në raport.
Gjithashtu, raporti nënvizoi tensionet e vitit të kaluar në veriun e Kosovës që kulmuan me sulmin terrorist në Banjskë të Zveçanit.
“Përleshjet mes nacionalistëve serbë dhe autoriteteve kosovare kanë shkaktuar humbje në jetë të njerëzve dhe plagosje, duke përfshirë edhe lëndimet e forcave paqeruajtëse të NATO-s në vitin 2023”
E pikërisht për këto rreziqe foli të martën kryeministri i vendit, Albin Kurti, i cili tha se duhet pasur kujdes nga Serbia sepse ajo është agresive dhe nevrike.
Ndërkaq analisti politik, Ognjen Gogiq, thotë se ekziston një mosbesim i thellë mes dy komuniteteve, andaj tensionet sipas tij nuk mund të përjashtohen.
“Armiqësitë etnike në Kosovë, dhe më gjerë mes serbëve dhe shqiptarëve, nuk u shuan kurrë. Nuk u bënë përpjekje të mjaftueshme për të kompensuar narrativat nacionaliste dhe për të kapërcyer mosbesimin e thellë midis komuniteteve. Prandaj, rreziqet e tensioneve etnike, madje edhe të dhunës, në Kosovë janë gjithmonë të pranishme. Veriu i Kosovës është pika e nxehtë ku incidentet etnike kanë më shumë gjasa të ndodhin. Situata në veri të Kosovës ka qenë veçanërisht e paqëndrueshme gjatë dy viteve të fundit, e cila kulmoi me sulmin në Banjska”, tha Ognjen Gogiq.
Megjithatë ai thotë se pas sulmit ndaj policisë së Kosovës në Banjskë, niveli i sigurisë është rritur në veri.
“Pas incidentit të Banjskës, grupi i militantëve serbë që kryen sulmin u shpërbë. Një rezervë e madhe armësh u konfiskua, së bashku me automjete dhe pajisje të tjera. Qasja në veri të Kosovës është më e vështirë pasi Policia e Kosovës dhe KFOR-i e përforcuan dislokimin e tyre në rajon. Prandaj, edhe nëse dikush do të donte të përsëriste një veprim të ngjashëm, nuk do të ishte e mundur të bënte një gjë të tillë”, u shpreh Gogiq.
Në raport mes tjerash përmenden edhe veprimet destruktive të liderit serb në Bosnje e Hercegovinë, Milorad Dodik, i cili synon de facto ndarjen e Republikës Serbe nga Bosnja dhe Hercegovina.