Po vijnë për të falur namazin e drekës.
Por xhematlinjtë e xhamisë në qytetin e Mamushës janë të shqetësuar me atë që ndodhi aty një ditë më parë.
Kjo pasi mesditën e së premtes, kjo xhami u përfshi nga flakët.
Shenjat e dëmeve janë ende prezente, derisa janë thyer disa dritare e muret janë nxirë.
E edhe hutbeja që shërben për ligjëratat e imamit, është larguar për shkak të dëmeve të mëdha.
Kryetari i kësaj xhamie, Adil Mazreku tregon për televizionin se si ndodhi ngjarja, derisa thotë se dëmi është mbi 50 mijë euro.
E banorët e këtij qyteti shpresojnë që pas muajit të Ramazanit, kjo xhami të renovohet.
Kurse nga Policia Rajonale e Prizrenit konfirmuan rastin duke thënë se dyshimet e para janë te rryma elektrike.
“Në vendngjarje ka dalur patrulla, ekipi i Forenzikës nga Suhareka, inspektorët komunal dhe ekspertët e zjarreve. Zjarri është lokalizuar. Shkaqet e zjarrit për momentin nuk dihen por dyshohet si pasojë e rrymës elektrike. Nga zjarri janë shkaktuar vetëm dëme materiale. Rasti vazhdon nën hetime”.
Kurse nga Kompania Kosovare për Distribuimin e Energjisë, treguan për televizionin se shpejt do të dalin me një raport të detajuar rreth këtij incidenti.
“Me të marrë informatën për djegien e një pjese të xhamisë, ekipi i specializuar i KEDS-it për vlerësimin e dëmeve ka dalë në vend të ngjarjes. Megjithatë, nuk është lejuar të futet brenda, meqë Policia e Kosovës po kryente ekzamiminet. Në ndërkohë, ky ekip do të dalë me një raport përfundimtar me të përfunduar vlerësimin e gjendjes në bazë të gjetjeve”.
Kjo xhami është ndërtuar para afro 50 vitesh.
