Kryeministri i vendit, Albin Kurti me rastin e 8 Marsit, Ditës së Gruas, ka thënë se kjo qeverisje që nga marrja e mandatit e ka shtyrë përpara fuqizimin e pozitës së gruas në shoqëri e në veçanti forcimin e pozitës ekonomike të saj.
Kurti e ka cekur se nga mbështetja për gratë, përmes subvencionimit të punëtorëve, në Kosovë janë integruar në tregun e punës mbi 600 mijë gra.
Se shteti ynë është feminist, Kurti po thotë që dëshmohet me politikat dhe gatishmërinë që të pasurohen ato.
“Fuqizimi i pozitës së grave në shoqëri e në veçanti forcimi i pozitës ekonomike të saj është njëra ndër ndryshimet thelbësore që qeveria jonë ka shtyrë përpara që nga fillimi i mandatit. Mbështetja e punësimit të grave, përmes subvencionimit të pagës së punëtores ka rezultuar mbi 600 mijë gra të integruara në tregun e punës, kur nga të punësuarit nga platforma” Superpuna” gjysma e tyre janë gra. Synimi ynë për barazi dhe drejtësi nuk ka alternativë. Politikat feminist po e ruajnë dhe po e përparojnë demokracinë ngado sot. Ato e kanë fituar luftën politike sepse tashmë nuk ka dyshime më se këto të dyja mund të ecin vetëm bashkë. Ky është edhe shteti për të cilin punojmë çdo ditë. Demokrat po, por edhe feminist gjithsesi. Këtë e dëshmojmë edhe ne me politikat tona dhe me gatishmërinë që t’i pasurojmë çdo ditë ato”, është shprehur ai.
Më tej, Kurti ka thënë se kjo qeverisje në secilin sektor ka marr masa në përmirësimin e jetës së grave.
“Në secilin dikaster kemi marr masa në përmirësim dhe lehtësimin e jetës dhe të përvojave të vajzave e të grave. Me shtesat, bursat, grantet, vaksinat, xhirollogaritë, masat për punësim, dënimet për dhunuesit, me inkurajimin për gratë jemi duke ecur krahas kërkesave të kohës dhe të vet atyre”, ka shtuar ai.
Ndërsa, ai ka përmendur edhe shtesat për lehona, ku kanë përfituar rreth 45 mijë gra.
“Ne qeverisim me parime socialdemokrate dhe ashtu siç kemi premtuar qasja jonë ka qenë e tillë edhe në respekt me politikat tona në mbështetjen e qytetarëve të republikës, filluar me shtesa për lehona e fëmijë, skema nga të cilat janë përftuese rreth 45 mijë lehona e rreth 400 mijë fëmijë që marrin shtresa, e rreth 90 mijë gra që hapin xhirollogari për herë të parë”, ka theksuar ai.
Kryeministri i Republikës së Kosovës, Albin Kurti, këto deklarata i ka bërë duke qenë pjesë në hapjen e konferencës së organizuar nga Agjencia për Barazi Gjinore, në kuadër të Zyrës së Kryeministrit të Republikës së Kosovës, në shënimin e Ditës Ndërkombëtare të Grave.