Futbollistet e Kombëtares së Kosovës, kanë mësuar kundërshtarët me të cilët do të përballen në edicionin e ri të Ligës së Kombeve.
Në këtë edicion, Kosova do të garojë në Ligën B, në të cilën u promovua pas suksesit në Ligën C të kësaj gare. Në shortin e tërhequr të martën në Nyon të Zvicrës, ku Kosova ishte në vazon e katërt.
“Dardanet” do të jenë pjesë e Grupit B4, të cilin e përbëjnë edhe Uellsi, Kroacia e Ukraina. Këto ndeshje i takojnë fazës së parë të kualifikimeve për Evropianin e vitit të ardhshëm. Faza e parë kualifikuese zhvillohet në nivele, përkatësisht në tri liga të ndryshme.
Dy xhirot e para të grupeve, do të luhen prej 3 deri më 9 prill, për të vazhduar me xhirot tre dhe katër nga 29 maji deri më 4 qershor, ndërsa dy xhirot e fundit do të zhvillohen prej 10 deri më 16 korrik të këtij viti.
Tri ekipet e para në grupet e Ligës B, e kanë të garantuar paraqitjen në plejof, ndërsa shorti për këtë fazë do të tërhiqet më 19 korrik. Futbollistet e Kosovës janë në një seri prej 14 ndeshjeve pa humbje, ku kanë regjistruar 13 fitore e 1 barazim. Në fakt, Kosova nuk di për humbje prej muajit nëntor të vitit 2022 kur pësoi nga Sllovenia.
