Kryeministri i Republikës së Kosovës, Albin Kurti, mori pjesë në ceremoninë e dhënies së certifikatave për gjeneratën e pestë të Asistentëve për fëmijë/nxënës me nevoja të veçanta arsimore.
Kryeministri Kurti tha se të të gjithë jemi të ndryshëm nga njëri-tjetri, si nga vetitë e karakterit, tiparet fizike, prirjet apo kërkesat e caktuara dhe kjo inkurajon zgjerimin e vetëdijes, thellimin e dijes dhe na jep mundësi t’i kuptojmë ndryshimet e t’i trajtojmë si duhet, duke synuar barazi për të gjithë.
“Të qenit ndryshe është vlerë për një shoqëri demokratike dhe të shëndoshë”, u shpreh ai.
Me tej, kryeministri Kurti theksoi se disa kualifikime kërkojnë vëmendje të posaçme dhe kujdes të veçantë, sepse mbështesin individë me nevoja të veçanta arsimore, prandaj, nuk ka mënyrë më të mirë për ta ndërtuar të ardhmen bashkë, se sa duke përgatitur profesionistë të kualifikuar e të specializuar, që më pastaj përgatisin të tjerët të zhvillojnë e të marrin aftësi të tyre e të reja.
“Një fakt i spikatur për gjeneratën tuaj të asistentëve, është se, fillimisht patëm planifikuar pesë grupe me 125 pjesëmarrës, por përfundimisht janë krijuar shtatë grupe me 180 pjesëmarrës nga 21 komuna të Kosovës anembanë vendit tonë”, tha kryeministri, duke shtuar se deri tani kemi 409 asistentë të certifikuar, gjithsej në pesë gjenerata, ndërsa aktualisht po e vijon trajnimin gjenerata e gjashtë.
Në fund ai përgëzoi Ministrinë e Arsimit për punën intensive dhe cilësore dhe falënderoi partnerët ndërkombëtarë LuxDev dhe Pearson për bashkëpunimin frytdhënës.
