Ministri i Shëndetësisë, Arben Vitia, tha se finalizimi i Projektligjit për shëndet riprodhues dhe fertilizim të asistuar mjekësor, përveç se që do të zvogëloj kostot financiare për qytetarët, do t’u mundësojë edhe shumë qifteve që ta kenë një proces më të mirë në sistemin publik.
Në një prononcim të shkurtër për media, Vitia bëri të ditur se tashmë kanë pranuar disa amendamente nga pozita dhe opozita, teksa shtoi se të njëjtat janë vlerësuar dhe do të vazhdojnë në lexim të dytë.
“Ka mungesë të informacioneve në këtë raport. Ne po mundohemi që ta shtyjmë një ligj i cili rregullon mbikëqyrjen, ligjshmërinë dhe sanksionimin, e atyre që mund të kenë probleme në realizimin e kësaj procedure, e që fatkeqësisht me udhëzimin administrativ aktual, asnjëra nga këto s’rregullohen. Neve gjithsesi na duhet ligji, ne nga leximi i parë kemi pranuar disa amendamente të pozitës dhe opozitës, natyrisht që disa i kemi vlerësuar dhe i kemi adaptuar për leximin e dytë. Mirëpo, disa kërkesa nuk janë problematike, sepse i humb komplet arsyeshmëria. Ky ligj do t’u mundësonte shumë qifteve, shumë grave në Kosovë, që ta kenë një proces të mirë në sistemin publik, e të mos harxhojnë më mijëra euro, ashtu sic janë duke harxhuar tani”.
Kujtojmë se Kuvendi i Kosovës ka miratuar në lexim të parë Projektligjin për Shëndet Riprodhues dhe Fertilizim të Asistuar Mjekësor.
Projektligji ishte kundërshtuar ashpër nga një pjesë e deputetëve.
Sipas projektligjit, të drejtën e shfrytëzimit të IVF-së e kanë edhe gratë e pamartuara, mbi 18 vjeç, që janë në gjendje të mirë shëndetësore e sociale dhe janë të afta “për fertilizim dhe për përkujdesje prindërore”./teve1.info/.