Dy persona janë arrestuar nën dyshimin se kanë kanosur me vrasje pjesëtarët e KFOR-it italian.
Lajmin e ka konfirmuar për “Betimi për Drejtësi“, Shaqir Bytyqi, zëdhënës i Policisë për rajonin e Prizrenit.
“Me datë 26.02.2024 rreth orës 10:10, Policia ka marrë informatën se në fshatin Lubiqevë, dy persona të dyshuar i kanë kanosur pjesëtarët e KFOR-it italian të cilët ishin për vizite në atë fshat. Patrulla policore ka dalë në vendin e ngjarjes dhe ka kontaktuar me karabinierët të cilët kanë deklaruar se përderisa ishin duke qëndruar në një lokal aty në fshat, të dyshuarit afrohen fillimisht duke i ofenduar e më pas njëri nga të dyshuarit i ka kanosur me vrasje duke ju thënë ,,se do shkoj në shtëpi të marr Kallashnikovin dhe do ju vras të gjithëve“. E më pas të dyshuarit janë larguar me veturë në drejtim të Prizrenit”, konfirmoi Bytyqi.
Bytyqi theksoi se të dyshuarit janë arrestuar, ndërsa janë bastisur shtëpitë e tyre.
“Në shtëpinë e njërit nga të dyshuarit është gjetur një pushkë dhe municion. Pas intervsitimit, me urdhër të prokurorit të dy të dyshuarit janë ndaluar për 48 orë”, shtoi ai.
