Dy të lënduar dhe katër po intervistohen për rastin rrahjes në Lipjan, ku policia shtiu me armë për t’i ndarë.
Policia e Kosovës ka dhënë detaje për rastin në Lipjan, ku pas përfshirjes në një rrahje të disa personave, një polic është detyruar të gjuaj me armë në ajër për të vënë nën kontroll situatën.
Sipas Policisë së Kosovës, rrahja ka filluar në fshatin Rusinoc të Lipjanit rreth orë 14:00.
Zëdhënësja e PK-së, Flora Ahmeti për teve1.info bëri të ditur se të njëjtit kanë vazhduar mosmarrëveshjen edhe në afërsi të stacionit të policisë në Lipjan.
“Personat e dyshuar kanë vazhduar mosmarrëveshjen edhe në afërsi të stacionit të policisë në Lipjan, ku njëri nga personat e dyshuar me automjet ka goditur qëllimisht dy persona , të cilët kanë pësuar lëndime dhe janë dërguar për tretman mjekësor”, ka thënë Ahmeti.
Ajo ka bërë të ditur se në përpjekje për të menaxhuar dhe vënë në kontroll situatën, një polic ka gjuajtur me armë zjarri në ajër.
“Lidhur me këtë rast në cilësinë e personave të dyshuar po intervistohen katër persona, ndërkohë që hetuesit në koordinim me prokurorinë dhe IPK-në po kryejnë veprimet e nevojshme hetimore”, ka thënë ajo.
