Deputetja e LDK-së, Doarsa Kica-Xhelili ka pasur kritikuar dhe e ka quajtur Vettingun si një proces të dështuar, duke thënë se është amputuar nga Komisioni i Venecias.
Madje Kica-Xhelili tha se ministrja e Drejtësisë në këto procese nuk e ka përkrahjen e ndërkombëtarëve.
“Arsyeja që po e them edhe këtë është se Komisioni i Venencias e amputojë Vettingun, por pse e amputojë për ne në Kosovë, por jo për Shqipërinë…Ne nuk na është dhënë besimi si politike kosovare ta shtymë këtë proces deri në fund, nuk na është dhënë besimi për diçka që i është dhënë të tjerëve. Pra, ka të bëjë specifikisht me ne si shoqëri dhe si politike. E pse nuk na është dhënë, sepse ka pasur papjekuri politike në qasjen që kemi pasur”, ka deklaruar ajo.
Kjo ka bërë që të reagojë ministrja Haxhiu, e cila tha se shpreson që konstatimi i deputetes së LDK-së për dështimin e reformës në drejtësi të jetë shqetësim dhe jo dëshirë e vetë deputetes.
Derisa sa i përket asaj se Qeveria s’e ka përkrahjen e ndërkombëtarëve për procesin e reformës në Drejtësi dhe Vettingut, Haxhiu ka thënë se e rëndësishme është përkrahja qytetare.
“Tha që s’e keni besimin e partnerëve, apo nuk e keni pasur. Për mua është e rëndësishme që ta kemi besimin e qytetarëve të Kosovës. Ne kemi pasur përkrahjen e qytetarëve për ta bërë Vettingun në sistemin e drejtësisë, për mua kjo është e rëndësishme. Ndërsa me partnerët ndërkombëtar, me shoqërinë civile mund të kemi në vazhdimësi diskutime për t’u përballur me argumente. Partnerët kanë thënë që Kosova s’duhet të ketë Vetting dhe kanë thënë se Kosova duhet të forcojë mekanizmat e brendshëm të vettingut”, ka thënë Haxhiu.
