Deputetja e Partisë Demokratike të Kosovës, Ariana Musliu-Shoshi, tregoi se gjatë raportimit të zëvendëskryeministrit, Besnik Bislimi, në Komisionin për Punë të Jashtme, është akuzuar për plagjiaturë gjatë kohës kur ishte studente.
Teksa tha se në këtë mbledhje s’ka pasur asnjë informatë konfidenciale, Musliu-Shoshi shtoi se Qeveria Kurti po tenton të ngritë “drama” në publik, kështu duke e mbajtur raportimin e Bislimit me dyer të mbyllura.
“Morra një sulm personal, i cili nuk është aspak për tu vlerësuar, por nëse zëvendëskryeministri e vlerëson, atëherë ato sulme të cilat i bën personale ndaj meje, mund t’i bëjnë edhe publike, sepse unë vlerësoj që jam faqebardhë në çdo aspekt. Sulmet ishin të nivelit profesor-student dhe gjoja se unë jam lëshuar në plagjiaturë në kohën sa kam qenë studente, gjë që nuk qëndron. Në këtë mbledhje s’pati as edhe një informatë të vetme të cilën e konsiderojmë konfidenciale. Pra, krejt ajo që provon pushteti të bëjë, është që të ngrish drama në publik se gjoja po flitet dicka me konfidencialitet. S’pati asnjë informatë më shumë se ajo që keni dëgjuar dhe keni parë në prononcimet e Bislimit. Më vjen keq që në nivelin akademik, kemi ardhur në pikën që në vend të raportohet për atë se çka po ndodhë, lëshohet në nivel kaq të ulët personal me mua dhe deputetët e tjerë”, deklaroi Musliu-Shoshi para mediave.
Më tej, deputetja e PDK-së, bëri të ditur se ka kërkuar nga Bislimi të dijë “nëse Amerika s’është partner me të cilin Kosova bashkëpunon”, teksa ka shtruar pyetjen se pse çështjet e brendshme të Kosovës po shndërrohen në instrumente diskutimi në organizata ndërkombëtare.
“Unë kërkova që të na tregojë nëse Amerika s’është partner me të cilin Kosova bashkëpunon, nëse shtetet e Bashkimit Evropian s’janë vendet mike që ne i vlerësojmë si aleat, nëse Borrell dhe Lajçak s’janë persona kredibil në përfaqësim, atëherë në çfarë rruge po shkon Kosova? Kush janë partnerët tanë që Kosova duhet të ecë përpara. Pse çështjet e brendshme të Kosovës duhet të shndërrohen në instrumente ku diskutohet në organizatat ndërkombëtare, siç ishte mbledhja e Këshillit të Sigurimit”, potencoi tutje Musliu-Shoshi.
Zëvendëskryeministri, Besnik Bislimi, ka raportuar në Komisionin për Punë të Jashtme dhe Diasporë, me dyer të mbyllura. Në raportim ka qenë e paraparë të diskutohet për dialogun Kosovë-Serbi./teve1.info/.
