Qeveria e Kosovës ka dhënë detaje për takimin që kryeministri i vendit, Albin Kurti, pati me emisarin special të BE-së për dialogut Kosovë-Serbi, Miroslav Lajçak.
Qeveria ka njoftuar se në takim u diskutua lidhur me aspektet e ndërlidhura me zbatimin e plotë të Marrëveshjes së Brukselit dhe Aneksit të Ohrit.
Po ashtu, më tej bëhet e ditur se Qeveria mbetet e përkushtuar për normalizim të plotë të marrëdhënieve me Serbinë, përfshirë njohjen reciproke.
“Në këtë takim u diskutua në lidhje me aspektet e ndërlidhura me zbatimin e plotë të Marrëveshjes Bazike të Brukselit dhe Aneksit Implementues të Ohrit, siguria ligjore përmes nënshkrimit të tyre, por edhe për tema e çështje tjera si psh. respektimi i procedurave ligjore drejt zgjedhjeve të parakohshme në katër komunat në veri të vendit. Qeveria e Republikës së Kosovës mbetet e përkushtuar për normalizim të plotë të marrëdhënieve me Serbinë dhe për njohje reciproke, përmes një procesi të dialogut të barabartë, të balancuar e të drejtë për palët”, thuhet në njoftimin e Qeverisë.
Kujtojmë se përveç me Kurtin, Lajcak u takua edhe me zëvendëskryeministrin Besnik Bislimi dhe presidenten e vendit, Vjosa Osmani./teve1.info/.