Presidentja e vendit, Vjosa Osmani është takuar sot me emisarin e BE-së, Mirsolav Lajçak të cilit i ka shprehur shqetësimin e saj lidhur me draft statutin e Asociacionit.
Osmani ka thënë se disa dispozita të këtij drafti, mund të jenë sfiduese gjatë zbatimit në praktikë.
“Sa i përket draftit të statutit të Asociacionit, Presidentja ritheksoi se institucioni i vetëm që mund ta interpretojë përfundimisht përputhshmërinë e këtij akti me Kushtetutën është Gjykata Kushtetuese e Kosovës, gjersa poashtu i shprehu shqetësimet e saj lidhur me disa dispozita të këtij drafti, të cilat mund të jenë sfiduese gjatë zbatimit në praktikë”, thuhet në njoftimin e zyrës së presidencës.
Osmani më tej ka theksuar se marrëveshja e Brukselit dhe aneksi i Ohrit i duhet të zbatohen në plotni.
Në takim, siç thonë nga presidenca u fol edhe për masat që BE-ja ka vendosur ndaj Kosovën, për të cilat Osmani thuhet se ka kërkuar që të hiqen pasi që ato janë të padrejta dhe krijojnë mungesë ekuilibri në dialog.
“Në takim u diskutua për zhvillimet e fundit në procesin e dialogut me Serbinë, me ç’rast Presidentja Osmani ritheksoi përkushtimin e Kosovës si palë konstruktive në këtë proces. Presidentja theksoi se marrëveshja e Brukselit e 27 shkurtit 2023 dhe aneksi i Ohrit i 18 marsit 2023 duhet të zbatohen në plotni. Presidentja Osmani ritheksoi nevojën e heqjes së masave të Bashkimit Evropian ndaj Kosovës, të cilat janë të padrejta dhe krijojnë mungesë ekuilibri në dialog. Në këtë drejtim, ajo përsëriti se Kosova ka ofruar organizimin e zgjedhjeve të reja në veri të vendit në përputhje me kornizën ligjore të Kosovës, duke miratuar edhe udhëzimin administrativ, ndërkaq theksoi pritjet e saj që kjo e drejtë e qytetarëve të realizohet pa vonesa e në përputhje me procedurat dhe legjislacionin në fuqi”, thuhet në njoftim.
Po ashtu, temë diskutimi mes Osmanit e Lajçakut ishin edhe të arriturat e fundit sa i përket zbatimit të marrëveshjes për energji si dhe asaj për targa, si hapa drejt normalizimit të raporteve ndërmjet Kosovës e Serbisë.