Ministrja e Arsimit, Arbërie Nagavci ka bërë të ditur se sot është shënuar hapja e aktivitetit “Qendrat e Partneritetit Arsimor për Bashkëpunim Ndëretnik”, shkruan teve1.info.
Sipas Nagavcit, kjo nismë do të sjellë laboratore moderne për STEM në 7 komuna të vendit, ku siç tha ajo, do të bashkëpunojnë të rinjtë e përkatësive të ndryshme etnike, me fokus të veçantë tek vajzat.
“Promovimi i diversitetit etnik dhe gjinor në fushat STEM është qëllim madhor i Qeverisë sonë, i cili ngërthen një mori aspektesh me rëndësi për zhvillimin e shoqërisë dhe ekonomisë sonë. Duke qenë në linjë të plotë me politikat tona, ky aktivitet do të realizohet në bashkëpunim të afërt me MASHTI-n dhe me Drejtoritë Komunale të Arsimit në komunat ku do të hapen këto qendra. I sigurova të pranishmit që dyert e MASHTI-t janë gjithnjë të hapura për mbështetje në të gjitha format e mundshme”, shkroi ajo.
Derisa pjesëmarrës në këtë hapje ishin edhe zv.kryeministri Besnik Bislimi, ambasadorin Hoovenier, përfaqësues të USAID dhe RIT Kosova./teve1.info./