Mbrojtja e Ismet Bahtjarit, përmes avokatit Felicity Gerry KC ka dorëzuar pranë Dhomave të Specializuara të Kosovës (DhSK) në Hagë një mocion me anë të secilit ka kundërshtuar bashkimin e çështjeve “Bahtjari dhe Januzi” me atë të Haxhi Shalës.
Në mocionin e 23 janarit 2024 Gerry KC ka kërkuar nga gjyqtari i vetëm që të refuzojë mocionin e ZPS-së për bashkimin e dy çështjeve.
“Mocioni për bashkim kundërshtohet”, thuhet në parashtrimet e mbrojtjes se Bahtjarit.
Në parashtrimet e veta, Gerry KC ka thënë se në këtë rast ekzistojnë mangësi procedurale.
“Përveç nevojës për avokat për z. Bahtijari që të ketë mundësinë e duhur për t’i shqyrtuar të gjitha provat, ekzistojnë mangësi procedurale themelore si në vijim: Asnjë material i ri dëshmues nuk është paraqitur për të mbështetur një aplikim të Rregullës 86(9) në lidhje me akuzat e pakonfirmuara. Kjo nga ana tjetër do të thotë se kërkesat e Rregullës 89 nuk mund të përmbushen”, thuhet në këtë parashtrim.
Sipas Gerry KC asnjë material provues nuk është paraqitur duke aplikuar njërën prej rregullave të kësaj gjykate që përcakton paraqitjen e materialit provues.
“Asnjë material provues nuk është paraqitur për të mbështetur një aplikim të Rregullës 86(3): Përmbledhja e ZPS-së i referohet materialeve të zbuluara, por jo materialeve dëshmuese që do të thotë se nuk është në përputhje me Rregullën 86(3)(a). Meqenëse skica duhet të jetë “një skicë e detajuar që demonstron rëndësinë e secilit artikull të materialit dëshmues për secilin pretendim, me referencë të veçantë për sjelljen e të dyshuarit në lidhje me krimin(et) e supozuar”, mocioni i ZPS-së nuk është gjithashtu në përputhje me Rregullën. 86(3)(b). Kjo nga ana tjetër do të thotë se kërkesat e Rregullës 89 nuk mund të përmbushen”, thuhet tutje.
Gerry KC në parashtrimet e tij ka thënë se nga parashtresat e Januzit kuptohet se mocioni i ZPS-së për bashkimin e çështjeve mbështetët në prova konfidenciale për të cilat ka kontest të pazgjidhur në çështjen “Bahtjari dhe Januzi”.
“Përveç kësaj, nga parashtresat e avokatit të Januzit për këtë mocion kuptohet se mocioni i ZPS-së për bashkim mbështetet në prova të cilat janë konfidenciale dhe për të cilat ka kontest të pazgjidhur në rastin KSC-BC-2023-10. Çështja e bashkimit nuk mund të përcaktohet si duhet pa zgjidhjen e asaj kontesti mbi të cilën z. Bahtijari miraton të njëjtat argumente si Januzi”, thuhet në parashtrimet e avokatit Gerry KC.
Ndryshe, Zyra e Prokurorit të Specializuar (ZPS) ka dorëzuar me 12 janar aktakuzën e përbashkët për çështjen gjyqësore të Sabit Januzit dhe Ismet Bahtjarit dhe atë të Haxhi Shalës.
Në njoftimin që kanë bërë DhSK-ja thuhet se aktakuza e përbashkët për këto dy cështje është konfidenciale.
Ndryshe, në konferencën e tretë me radhë mbi ecurinë e çështjes ndaj Ismet Bahtjarit dhe Sabit Januzit, gjykatësi i procedurës paraprake Nicolas Guillou, kishte nxjerrë një urdhër gojor, ku ZPS-në e urdhëroi që aktakuzën e përbashkët ndaj Bahtjarit, Januzit dhe Haxhi Shalës, ta dorëzojë jo më vonë se 12 janari 2024.
Ndryshe në seancën e parë, para gjyqtarit të procedurës paraprake, Nicolas Guillou, Bahtijari dhe Januzi janë deklaruar të pafajshëm për akuzat që iu vihen barrë nga Zyra e Prokurorit të Specializuar.
Aktakuza ndaj tyre është ngritur më 4 tetor 2023, me të cilën ngarkohen se kanë tentuar të bindnin një dëshmitar të mos japë dëshmi.
Ata akuzohen për përpjekje për pengim të personave zyrtarë për kryerjen e detyrës zyrtare, me anë të kërcënimit të rëndë, midis më së paku 5 dhe 12 prillit 2023, vepër penale kundër rendit publik, e ndëshkueshme në bazë të neneve 17, 21, 28, 31, 33, 35 dhe 401 (1) dhe (5) të KPK-së, dhe neneve 15 (2) dhe 16 (3) të Ligjit.
Po ashtu, për përpjekje për pengim të personave zyrtarë për kryerjen e detyrës zyrtare, me anë të pjesëmarrjes në veprimin e përbashkët të një grupi, midis më së paku 5 dhe 12 prillit 2023, vepër penale kundër rendit publik, e ndëshkueshme në bazë të neneve 17, 21, 28, 33, 35, dhe 401 (2) dhe (5) të KPK-së, dhe neneve 15 (2) dhe 16 (3) të Ligjit. Po ashtu, për përpjekje për frikësim gjatë procedurës penale, midis më së paku 5 dhe 12 prillit 2023, vepër penale kundër administrimit të drejtësisë dhe administratës publike, e ndëshkueshme në bazë të neneve 17, 21, 31, 33, 35 dhe 387 të KPK-së, dhe neneve 15(2) dhe 16 (3) të Ligjit.
Ndryshe, më 6 tetor, në një njoftim të Zyrës së Prokurorit të Specializuar është thënë se Ismet Bahtjari dhe Sabit Jonuzi janë arrestuar dhe transferuar në Hagë nën dyshimin se kanë tentuar të bindnin një dëshmitar të mos japë dëshmi.
Sipas aktakuzës, Sabit Januzi dhe Ismet Bahtjari, përmes kërcënimit të rëndë dhe veprimit të përbashkët të një grupi personash në të cilin të dy morën pjesë, tentuan të pengonin persona zyrtarë, si gjykatës, prokurorë, zyrtarë të gjykatës, zyrtarë të prokurorisë apo persona të autorizuar nga gjykata ose prokuroria, në kryerjen e detyrave zyrtare.
Kurse, në aktakuzën e 12 dhjetorit 2023, Kryeprokurorja e Specializuar, Kimberly West akuzon Shalën për frikësim të dëshmitarëve, tentativë me anë të kërcënimit të rëndë për të penguar personat zyrtarë në kryerjen e detyrave zyrtare individualisht dhe me pjesëmarrje në grup. /BetimipërDrejtësi
