Ministri i Punëve të Brendshme, Xhelal Sveçla dhe Rektori i Universitetit të Prishtinës, Qerim Qerimi kanë nënshkruar Memorandum Bashkëpunimi mes dy institucioneve, i cili mes tjerash u ofron 600 studentëve praktikë profesionale në këtë ministri.
“Si pjesë e kësaj marrëveshje, Ministria e Punëve të Brendshme do t’i hapë dyert për 600 studentë të Universitetit të Prishtinës për t’u ofruar mundësinë e një praktike profesionale. Studentët e profileve të ndryshme për tre muaj do të kenë mundësi të fitojnë përvojë brenda Ministrisë dhe agjencive që ajo mbulon dhe në fund të praktikës të certifikohen për përfundimin me sukses të punës profesionale”, thuhet në njoftimin e MPB-së.
Gjithashtu nga kjo ministri bëjnë me dije se ky bashkëpunim do të ofrojë ekspertizë profesionale dhe akademike për hartimin e fondit të pyetjeve që shërbejnë për vlerësimin e njohurive dhe cilësive profesionale të kandidatëve të cilët u nënshtrohen procedurave rekrutuese në shërbimin civil të Republikës së Kosovës. /teve1.info/
