Paneli i Gjykatës Supreme të Dhomave të Specializuara të Kosovës, nxori dy vendime lidhur me kërkesën e mundshme për mbrojtjen e ligjshmërisë në çështjen Salih Mustafa.
Në vendimin e parë të publikuar të enjten, thuhet se Paneli përcaktoi se Venkateswari Alagendra nuk e kishte njoftuar Trupin Gjykues II, lidhur me synimin e saj që të përfaqësojë Mustafën.
“Rrjedhimisht, Paneli deklaroi se emërimi i Alagendras si avokate e re e Mustafës nuk ka efekt juridik dhe urdhëroi Administratoren që të caktojë mbrojtësin kujdestar për të përfaqësuar Mustafën derisa të zgjidhet çështja”, thuhet në njoftimin e Dhomave të Specializuara të Kosovës në Hagë.
Po ashtu, në vendimin e dytë, thuhet se Paneli hodhi poshtë kërkesën e Mbrojtjes së Mustafës lidhur me zgjatjen e afatit për të dorëzuar kërkesën për mbrojtjen e ligjshmërisë, pasi Venkateswari Alagendra nuk ka legjitimitet për të dorëzuar ndonjë kërkesë në emër të Mustafës.
“Paneli gjithashtu vuri në dukje se, edhe nëse Alagendra do ta gëzonte këtë legjitimitet, afatet kohore të parashikuara në Ligj (kërkesat për mbrojtjen e ligjshmërisë duhet të dorëzohen brenda tre muajve nga aktgjykimi i formës së prerë) nuk mund të ndryshohen me Rregulloren e Punës dhe të Provave”, u tha në këtë njoftim.