Policia e Kosovës është detyruar të gjuajë me armë drejt një veture me targa të huaja, pasi që ngasësi i veturës nuk është ndalur pas urdhrit për kontroll, ku i njëjti dyshohet se brenda veturës kishte narkotikë.
Policia ka bërë të ditur se i dyshuari nuk ka ndaluar dhe me veturë ka sulmuar e goditur një zyrtar policor dhe po ashtu një veturë të policisë.
Lidhur me këtë, ka reaguar Lista Serbe, ku ka dënuar përdorimin e armëve të zjarrit duke pretenduar se “një sërë plumbash të gjuajtur nga policët e Kosovës përfunduan në dritaret e fëmijëve dhe dhomat e banimit të shtëpive familjare, shkatërruan fasadat e ndërtesave dhe shkaktuan frikë te qytetarët”.
“Për të shmangur konfuzionin, ne absolutisht nuk mbështesim askënd që kryen vepra penale, por gjithashtu kërkojmë që në punën e policëve të respektohen rregullat për kryerjen e operacioneve policore në të cilat thuhet qartë se nuk lejohet rrezikimi i jetës së qytetarëve dhe fëmijëve. Përdorimi i armëve të zjarrit sot mund të kishte sjellë vdekjen e njerëzve të pafajshëm, sepse armët e zjarrit përdoreshin në mes të ditës, kur në trotuar kishte dhjetëra qytetarë që kishin dalë për shëtitje me fëmijët e tyre”, thuhet në reagim të Listës Serbe.
Ndërkohë, nga Policia e Kosovës është njoftuar se nga ky rast nuk ka persona të lënduar.
Ndërkaq, i dyshuari ka ikur derisa në makinën që është përdorur në veprën penale është gjetur dhe konfsikuar 1.5 deri në 2 kilogramë lëndë narkotike e llojit marihuanë.
