Ish-ushtaraku Hysen Gecaj, i ftuar në emisionin “Këndi i Debatit” në Tëvë1, ka folur lidhur me hetimet e rastit të Banjskës.
Gecaj vlerëson se Kosova nuk ka kapacitetet e duhura për një hetim si rasti Banjska, duke theksuar se shkak i vonesës së një raporti mund të jetë ndërhyrja e politikës.
“Ne jemi në fazën e shtetndërtimit të shumë kapaciteteve të nevojshme për këtë aspekt të hetimeve, prandaj jo ekspertiza e duhur sjell deri te vonesat për një raport të tillë. Faktor është edhe ai politik që e ngatërron nivelin e vet të përgjegjësisë dhe detyrave policore. Ne momentin që politika ndërhyn në hetime që janë thjeshtë profesionale atëherë aty nuk mund të presim rezultate”, tha ai Gecaj.
Gecaj është shprehur se e ka parë që politika ka pas dorë bukur shumë, ndoshta jo pse ka pas një qëllim të caktuar por për një përfitim ndoshta momental politik brenda shtetit.
“Në vend që aty të duket Drejtori i Policisë ose dikush prej operative duke u sqarua rreth atij arsenali që është kap atje dhe ngjarjet që janë zhvillu aty më tepër e kemi parë ministrin Sveçla si figurë politike. Natyrisht që ministri del dhe thotë fjalën e vet në kuptimin politik, por jo të lëshohet në vlerësime operacionale e taktike”, ka shtuar ai.
Kujtojmë që më 24 shtator, grupe të armatosura serbësh sulmuan policinë e Kosovës në fshatin Banjskë të Zveçanit, duke vrarë një polic. Në përleshjet e armatosura që pasuan, u vranë edhe tre sulmues serbë. Policia konfiskoi, po ashtu, sasi të madhe armatimi.
