Profesori universitar, Abit Hoxha, tha se qeveria e Kosovës i frikësohet kontrollit të serbëve lokal të Kosovës nga Beogradi përmes marrëveshjes për Asociacionin e Komunave me shumicë serbe në Kosovë, raporton teve1.info
Në emisionin “Info-Nata” në Tëvë1, Hoxha tha se nuk ka arsye tjetër qeveria e Kosovës të frikësohet për Asociacionin, pasi siç tha ai, ligjërisht një proces i tillë administrativ nuk mund t’i ndalohet askujt.
“Qeveria po heziton për shkak të kontrollit të Beogradit ndaj serbëve lokal të Kosovës e cila është së pari tragjike për serbët në Kosovë, së dyti edhe e çalon të gjithë procesin e të qenit shtet funksional, jo sovran sepse sovraniteti është diçka tjetër, është mundësia për të marrë vendim. Por funksionimin e shtetit e vë në njëfarë çalimi institucional i cili duhet të tejkalohet. Pra qeveria e Kosovës mendoj unë frikësohet prej kontrollit të Serbisë në serbët e veriut posaçërisht sepse diçka tjetër nuk ka çka i frikësohet. Një çështje administrative ose organizim administrativ i cili serbët e veriut do t’i bashkonte në raport me institucionet e Kosovës si iniciativë e përbashkët nuk mund të jetë e ndaluar me ligj. Edhe institucionet e tjera mund ta bëjnë një asociacion, shembull asociacioni i komunave të Dukagjinit ose Anamoravës dhe nuk mund t’i ndalohet me ligj. Por ideja është se kontrolli i Beogradit përmes një institucioni të tillë e pamundëson funksionimin e unitaritetit të shtetit të Kosovës”, tha ai.
Hoxha tha se Qeveria e Kosovës duhet ta hartoj një draft-statut të cilin sipas tij duhet ta diskutoj me bashkësinë ndërkombëtare.
Megjithatë, profesori Hoxha u shpreh se nuk sheh këtë vit ndonjë marrëveshje të Kosovës me Serbinë.
“Qeveria duhet të hartoj një draft i cili do të duhej të diskutohej me bashkësinë ndërkombëtare për rregullimin e tri komunave të veriut dhe nuk duhet të jetë pjesë e marrëveshjes në mes të Kosovës dhe Serbisë e cila do të duhet të jetë gjithëpërfshirëse për ndalimin e konfliktit dhe për zotimin që të mos pengojnë njëra-tjetrën në rrugën e tyre drejt BE-së apo edhe institucioneve tjera ndërkombëtare dhe kjo mendoj që qeveria e Kosovës duhet të jetë proaktive. Nuk mendoj se do të ketë marrëveshje Kosovë-Serbi. Nëse lidershipi i tanishëm do të ishte i gatshëm ta bëjë një marrëveshje, pse të mos e bëjë marrëveshjen shembull në vitin 2023 por ta pres 2024, unë nuk e shoh ndonjë dëshirë apo mundësi me lidershipin në serbi por mendoj se as lidershipi në Kosovë nuk është shumë i gatshëm për një marrëveshje të tillë”, tha ai.
