Kryetari i Prishtinës, Përparim Rama ka bërë të ditur se në 10 ditët e fundit të dhjetorit 2023, kanë marrë pjesë 130 mijë qytetarë për festa të fundvitit në Prishtinë.
Rama përmes një postimi në Facebook, ka shkruar se sa i veçantë dhe vibrant është kryeqyteti.
“Sheshet tona, rrugët e lagjet e ndryshme janë mbushur me qytetarë si kurrë më parë. Bisedat me njëri – tjetrin të shoqëruara me kafen, çajin apo verën e ngrohtë nën tingujt e magjishëm të këngëve tona të interpretuara mrekullisht nga artistët tanë, na treguan edhe njëherë se sa i veçantë, vibrant e i ngrohtë është kryeqyteti ynë”, shkroi Rama.
Ndryshe, Rama ka shkruar se do të vazhdon me intervenimin e gjelbërimit për kryeqytetin.
“Në Prishtinë, këtë vit në hapësirat publike, hapësirat e qytetarëve, do të vazhdojmë me intervenimin në shtimin e gjelbërimit, krijimin e këndeve për fëmijë, shtimin e ndriçimit publik dhe rregullimin e disa prej tyre me kalldrëm.Do të organizojmë super festivale, koncerte, lojëra e shumëçka tjetër, për të sjellë momente të veçanta për të gjithë ne, sepse kemi projekte me të cilat do t’ua kthejmë hapësirat publike qytetarëve”, ka shkruar Rama./teve1.info/
