Zbatimi i marrëveshjes për targat e automjeteve është dëshmi se dialogu ndërmjet Kosovës dhe Serbisë është i mundur dhe se Brukseli po punon në zbatimin e Marrëveshjes së Ohrit, e cila është ligjërisht e detyrueshme për të dyja palët, tha sot zëdhënësi i Komisionit Evropian, Peter Stano, në Bruksel.
Stano ka theksuar se dialogu do të vazhdojë sapo të formohet qeveria e re e Serbisë dhe Komisioni Evropian do t’i ndihmojë të dyja palët në këtë, sepse sipas tij, Kosova dhe Serbia duhet të zbatojnë gjithçka që është specifikuar.
I pyetur nëse mund të pritet një takim në nivelin më të lartë në dialogun Kosovë – Serbi, Stano tha se “progresi në dialog vazhdon në të gjitha nivelet” dhe se takimi mes presidentit të Serbisë, Aleksandar Vuçiq, me kryeministrin e Kosovës, Albin Kurti, do të ndodh kur të plotësohen kushtet dhe të përcaktohet agjenda e një takimi të tillë.
Stano ka deklaruar se masat ndaj Kosovës do të vazhdojnë të mbeten ende në fuqi deri në momentin kur hapa të mjaftueshëm poizitiv të jenë ndërmarr.
“Sa i përket masave, natyrisht se ne po e përcjellim situatën çdo ditë nga afër. Ne kemi njerëz në terren dhe i kemi dedikuar përpjekjet dhe vëmendjen tonë për të parë se çfarë po ndodh. Ne gjithashtu po punojmë me partnerët për t’i ndihmuar për të ndërmarrë hapa të nevojshëm për të deeskaluar dhe për t’u përballur me problemet që kanë kontribuuar në krizat e fundit dhe kur hapa të mjaftueshëm poizitiv të jenë ndërmarr atëherë BE-ja do të rivlerësojë masat e marra ndaj Kosovës dhe heqjen e mundshme të tyre”, tha Stano.
Qeveria e Kosovës ishte njoftuar për masat e BE-së më 28 qershor dhe ato hynë në fillim të korrikut. Ato u vendosën për shkak të mospërmbushjes së kushteve të BE-së dhe Shteteve të Bashkuara për shtensionimin e situatës në veri të Kosovës. Tensionet në këtë zonë të banuar me shumicë serbe u rritën në fund të majit./teve1.info/
