Kryetari i Rahovecit, Smajl Latifi, është shprehur i tronditur nga vdekja e dy mërgimtarëve që u aksidentuan mbrëmë në Hungari.
Latifi u ka shprehur ngushëllime familjarëve të viktimave.
“I tronditur nga vdekja tragjike në aksident komunikacioni në Hungari e Jetmir Rexhepit nga Celina. Viktimë e aksidentit ka qenë edhe Kushtrim Hoxhaj nga Prizreni. Ngushëllimet më të sinqerta familjes Rexhepi nga Celina dhe familjes Hoxhaj nga Prizreni. Jetmiri dhe Kushtrimi, pushofshin në paqe!”, ka shkruar Latifi në Facebook.
Ndërkohë, për Tëvë1 familjari i të ndjerëve, Bashkim Hoxha, ka bërë të ditur se viktimat kanë qenë duke ardhur nga Hungaria për në Kosovë.
Hoxha ka thënë se vetura e viktimave është përplasur me një kamion, ku pastaj është përfshirë nga flakët që për pasojë ka mbetur i vdekur J.R., ndërsa K.H., ka ndërruar jetë gjatë rrugës për në spital.
“Ata janë nisur për Kosovë. Parmbrëmë rreth orës 1:15 minuta janë ndeshur me një kamion. Detaje më të hollësishme nuk kemi për momentin në lidhje me rastin. Na është thënë kamioni ka ndërruar anë dhe i ka dalë përpara, pastaj kanë marrë flakë, J.R., është djegur me gjithë dokumentet që ka pasur në xhaketë, K.H., ka ndërruar jetë rrugës për në spital. Aksidenti ka ndodhur në Hungari duke ardhur për në Kosovë”, ka deklaruar Hoxha.
Njëri nga viktimat, J.R., ishte nga fshati Celinë i Komunës së Rahovecit, ndërsa K.H. nga Prizreni, të cilët edhe kishin lidhje familjare.
Sipas njoftimit të familjarëve, K.H., ishte djali i vetëm i familjes, ndërsa J.R., ishte i martuar me motrën e K.H../teve1.info/
