Kampioni i Anglisë, Manchester City ka siguruar shërbimet e talentit argjentinas, Claudio Echeverri. Lajmi është bërë i ditur të mërkurën nga mediumet argjentinase, të cilat kanë insistuar se City tashmë ka arritur marrëveshje me River Platen për transferimin e mesfushorit të ri.
17-vjeçari vlerësohet si njëri prej talenteve më të mëdha të futbollit dhe për shërbimet e tij, City ka mposhtur konkurrencën e Barcelonës.
Për kartonin e mesfushorit ofensiv, City do të paguajë 25 milionë euro, ndërsa Echeverri do të qëndrojë në huazim te River Plate të paktën për një vit përpara se të transferohet në Angli.
Echeverri është produkt i akademisë së River Plates, ndërsa këtë verë është promovuar në ekipin e parë.
Në gjashtë ndeshje të luajtura këtë vit, ai ka dhënë një asistim, ndërsa me River Platen ka kontratë deri në fund të vitit të ardhshëm.
