Të mërkurën, Sekretari i Shtetit i SHBA, Antony Blinken u takua me homologët e tij të NATO-s, plus ministrat e jashtëm nga vendet joanëtare të NATO-s, duke përfshirë Australinë dhe Japoninë.
Shefi i NATO-s, Jens Stoltenberg paralajmëroi se lufta mund të zgjasë me vite, pasi presidenti rus, Vladimir Putin dëshiron “të kontrollojë të gjithë Ukrainën”. Ai shtoi se gjatë javëve të ardhshme, zyrtarët presin që forcat ruse të rifurnizohen me karburant, ushqim dhe furnizime të tjera, me synimin për të nisur një ofensivë të re brutale në rajonin Donbas të Ukrainës lindore.
Sekretarja e Jashtme e Britanisë, Liz Truss tha se “epoka e angazhimit me Rusinë ka mbaruar” dhe “ne kemi nevojë për një qasje të re ndaj sigurisë në Evropë bazuar në qëndrueshmërinë, mbrojtjen dhe parandalimin”. Ajo shtoi se po punon me homologët e saj të G7 për të vendosur më shumë sanksione ndaj bankave ruse, shkruan CNN, përcjell teve1.info
Ministri i Jashtëm i Lituanisë i quajti “zhgënjyese” sanksionet e propozuara të Bashkimit Evropian ndaj Rusisë, duke i krahasuar ato me sanksionet ndaj qirinjve ose druve të zjarrit. Ai bëri thirrje që blloku të vendosë një embargo të naftës ndaj Moskës, duke shtuar: “Nëse jemi serioz në lidhje me reagimin tonë ndaj masakrave të Bucha dhe qyteteve të tjera që po zbulohen, atëherë duhet të jemi serioz me sanksionet tona.”
Ndërsa, Ministri i Jashtëm kanadez tha se Kanadaja do të thërrasë ambasadorin e Rusisë në Otava lidhur me akuzat për vrasje masive të civilëve në Bucha, një periferi të Kievit, nga ushtarë rusë.