Asamblisti Sveçla tha se këtë shqetësim e kanë ngritur si lëvizje Vetëvendosje edhe në Kuvendin Komunal të Prishtinës ,por sipas tij nuk është marrë asnjë veprim.
Sipas Vv-së partia që e quan veten institucionaliste nuk i ka përfillur ligjet dhe nuk i ka respektuar vendimet e institucioneve.
“Ne e dinim se ky është modeli i qeverisjes së LDK-së, e kemi parë shumë herë deri më tani, në shumë qytete të Kosovës, e gjendja e përgjithshme urbanistike në Prishtinë është vula më e mirë e modelit qeverisës së saj, por nuk besonim që një arkitekt i cili vazhdimisht e ka potencuar përgatitjen dhe përvojën e tij profesionale në Evropë, do të mbyllë sytë para një akti të tillë të shëmtuar e antiligjor që ka ndodhur në qendër të kryeqytetit e për më tepër nga subjekti që e ka kandiduar vetë atë”, thuhet në njoftimin e Vv-së.
Këshillëtarët komunalë thanë se megjithëse i është refuzuar leja, LDK-ja ka shfrytëzuar kohën e balotazhit për renovimin e objektit të tyre, te Qafa, i cili gjendet në zonën e mbrojtur të qytetit
Tutje nga Vetëvendosje thanë se janë duke kërkuar nga kryetari, që sa më parë, të inicioj procedurat e nevojshme e të parapara me ligj për dënimin e personave përgjegjës që kanë bërë shkelje ligjore duke rindërtuar pa leje, kthimin e objektit në gjendjen që ka qenë dhe po ashtu marrjen e masave të nevojshme kundër zyrtarëve të inspeksionit që nuk e kanë kryer punën e tyre për të cilën paguhen nga taksat e qytetarëve të Prishtinës.
