Është ndër institucionet e para të krijuara pas luftës në Kosovë.
Fillimisht si Shërbim Veterinar i Kosovës në vitin 2000, e më pas si Agjenci e Veterinës dhe Ushqimit të Kosovës.
E që nga riorganizimi i saj, kjo agjenci është ballafaquar me mungesë të inspektorëve.
Mirëpo, përkundër kërkesave të vazhdueshme, një gjë e tillë nuk është realizuar.
Madje, nga nëntori i këtij viti, 57 inspektorë nga mbi 100 të tillë, nga kjo agjenci kanë kaluar në Ministrinë e Shëndetësisë.
Kështu, numri i tyre pothuajse është përgjysmuar.
Sipas AUV, e përgjysmuar po mbetet edhe puna në terren.
“Kërkesat për shtim të inspektorëve janë histori e gjatë, ka mbi dhjetë vite që ne bëjmë kërkesë të vazhdueshme. Ne jemi në pritje të rekrutimit të inspektorëve. Kalimi i inspektorëve në MSH neve na len hendikep por në këtë fazë transitore këta do të vazhdojnë të kryejnë detyra në aspektin e kontrollit të ushqimeve, derisa ne të rekrutojmë inspektorë që me ligj të ushqimit dhe me ligjin për inspektime do të quhen inspektorë të sigurisë ushqimore”, thotë Lamir Thaçi nga AUV-i.
E pritja për rekrutimin e inspektorëve të ri ende po vazhdon.
Mirëpo, si do të mbulohet terreni nga kjo agjenci në këtë periudhë?
“Deri në këtë kohë, do të mbulohet nga inspektorët sanitarë dhe pastaj kur të rekrutohen inspektorët atëherë do të kemi edhe ndarje të përgjegjësive. Ne do të jemi përgjegjës kryesorë dhe të vetëm të sigurisë ushqimore, kurse ata do të kontrollojnë në fushën e përgjegjësisë së tyre ku hyn higjiena, ligji i duhanit dhe fusha tjera që i mbulon inspektorati sanitar”, deklaroi Thaçi.
Kryetari i Komisionit për Shëndetësi, Bekim Haxhiu thekson se Qeveria po abuzon me inspektorët sanitarë.
“Krejt çështja me inspektorët sanitar por edhe me inspektorët shëndetësor është duke u abuzuar nga qeveria e RKS, janë duke u përdorur si instrument për të kërcënuar bizneset jo për të monitoruar zbatimin e ligjit dhe krejt procesi i përzgjedhjes së konkursit për inspektorë ishte i paligjshëm, me shkelje ligjore”, tha Haxhiu.
Agjencisë së Ushqimit dhe Veterinarisë i janë shtuar kontrolli Sanitar dhe Fitosanitar që nga viti 2009.
