Lidhja Demokratike e Kosovës (LDK) ka zgjedhur sot kryesinë e re. Me këtë rast, i pari i kësaj partie, Lumir Abdixhiku është shprehur i bindur se kjo kryesi do të shërbejë mbarë e drejtë.
Përmes një postimi në Facebook, Abdixhiku ka thënë se koha e LDK-së po vjen, raporton teve1.info
“Jam i bindur se kjo Kryesi, me 16 doktorë shkencash, me 10 magjistra, me kryetarë komunash, deputetë e kryetarë degësh, me veprimtarë të të gjitha gjeneratave, do të shërbejë drejtë, do të shërbejë mbarë, do të shërbejë djathtë, drejt fitores sonë të madhe. Në diskutimet tjera mbi tre orëshe në Këshill, vendosëm për ndarjen e përgjegjësive regjionale për secilin anëtar të Këshillit; sikurse dhe nisjen e hartimit të listës së kandidatëve për deputetë që nga tani. Do të jemi në terren, në çdo anë; do të jemi me qytetarët tanë në Kosovë e në mërgatë. Sepse koha jonë po vjen. Sepse ‘Rruga e re’ ka nevojë për secilin prej nesh”, ka shkruar ai.
Në krye të partisë është Lumir Abdixhiku, pastaj me Anton Quni si nënkryetar për Mërgatë, Hykmete Bajrami, nënkryetare për Politika Zhvillimore, Doarsa Kica Xhelili, nënkryetare për Marrëdhënie me Jashtë, Gazmend Muhaxheri, nënkryetar për Organizim Partiak, Lutfi Haziri, nënkryetar për Bashkëpunim Rajonal.
Ndërkohë, sekretarë u zgjodhën Imri Ahmeti dhe Sokol Haliti. /Teve1.info/
