Deputetja, Hykmete Bajrami, është zgjedhur nënkryetare e Lidhjes Demokratike të Kosovës (LDK), me propozim të kryetarit të këtij dikasteri politik, Lumir Abdixhiku.
Bajrami funksionin e nënkryetares e konsideron përgjegjësi, pasi që siç thotë ajo këtë pozitë e kanë mbajtur njerëzit që kanë bërë histori.
“Funksionin e Nënkryetares së LDK-së e konsideroj përgjegjësi për shkak se në Lidhjen Demokratike të Kosovës këtë pozitë e kanë mbajtur njerëzit që kanë bërë histori si Fehmi Agani, Nekibe Kelmendi e Sabri Hamiti si dhe plot gra e burra tjerë që kanë lënë gjurmë në themelet e Republikës së Kosovës”, ka shkruar Bajrami në Facebook.
Ajo thotë se LDK është vula e të gjitha proceseve që kanë ndodhur në Kosovë, duke theksuar lirinë, pavarësinë dhe demokracinë.
“Prandaj, rruga e nisur nga Ibrahim Rugova e Fehmi Agani, të pasuar nga Nekibe Kelmendi dhe nga gratë e burrat më të mirë të këtij vendi do të vazhdojë me ‘Rrugën e Re’, me rrugën që sot i duhet Republikës së Kosovës”./teve1.info/
