Ferati në një lidhje direkte në emisionin “Ditari” në Tëvë1, ka thënë se ky problem ka filluar shumë më herët në Serbi që nga viti 2012, mirëpo si praktikë administrative ka nisur që nga viti 2015 e tutje.
Ajo thotë se 90 % e shqiptarëve të komunës së Medvegjës janë pasivizuar e më pas janë larguar nga regjistrat civil dhe listat votuese.
“Ky problem ka filluar shumë më herët në Serbi konkretisht në vitin 2012, kur ka hyrë në fuqi ligji për vendbanim dhe vendqëndrim mirëpo si praktike administrative shlyerja masive e adresave të shqiptarëve në Serbi fillon në vitin 2015 e tutje. Komuna e Medvegjës është komunë multietnike ku shqiptarët përbëjnë një shumicë relative të popullsisë dhe atje mund të them se 90% të tyre janë pasivizuar më pas janë larguar nga regjistrat civil dhe listat votuese. Unë i kam hulumtuar uljen e personave të pasivizuar dhe uljen e numrit të votuesve dhe kemi ardhur në përfundim që në Komunën e Medvegjës janë 4214 persona që është numri më i lartë në gjithë Serbinë dhe 80% e tyre kanë qenë shqiptarë”, ka thënë Ferati.
Sipas saj, e njëjta gjë ka ndodhur edhe në Bujanoc.
Ferati ka deklaruar se nga hulumtimet në terren ka dalë se një numër i madh i qytetarëve janë shpallur de jure të vdekur në Serbi, dhe të njëjtit nuk kanë të drejt as në dokumente e as në sigurim shëndetësor.
Ajo thotë se kjo praktikë ka për qëllim që t’i shpërngul shqiptarët nga ky rajon i Serbisë.
“E njëjta ka ndodhur edhe në Malësi të Bujanocit, por edhe më pak është e shprehur në Preshevë nga ajo çka kemi mundur të vërejmë në teren por pasojat janë të qarta sepse kemi një numër të madh të qytetarëve që janë shpallur de jure të vdekur në Serbi, nuk kanë të drejtë as në dokumente as në sigurim shëndetësor e çka është për tu shqetësuar dhe çka na bën të kuptojmë që kjo praktike e ka për qëllim që t’i shpërngul shqiptarët nga ky rajon i Serbisë është fakti që atyre nuk iu kanë lëshuar as vërtetimet me shkrim. Përveç kësaj janë refuzuar edhe dokumentet si letërnjoftimet dhe pasaportat”, ka përfunduar Ferati./teve1.info/
