Lidhja Demokratike e Kosovës (LDK), Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë konfirmuar se kanë pranuar nga BE-ja draft-statutin e Asociacionit.
Lidhur me këtë çështje, në një përgjigje për Teve1.info, nga AAK-ja bëjnë të ditur se draft-statuti i pranuar u është shpërndarë anëtarëve të kryesisë dhe komentet rreth tij do të diskutohen në një mbledhje të partisë të thirrur më 7 dhjetor.
Bëhet e ditur se pas komenteve të kryesisë, AAK-ja do dalë me një qëndrim publik rreth draft-statutit.
“Aleanca për Ardhmërinë e Kosovës, ka pranuar verzionin zyrtar të draft-statutit të Asociacionit të Komunave me Shumicë Serbe. Të njëjtin i ka shpërndarë gjithë anëtarëve të kryesisë së Aleancës. Është kërkuar nga anëtarët e kryesisë t’i bëjnë komentet e tyre lidhur me draft-statutin dhe të njëjtat do të diskutohen në mbledhjen e radhës së kryesisë së Aleancës, të thirrur më datë 7 dhjetor, në ora 17:00. Pas komenteve të anëtarëve të kryesisë, AAK do të dalë me qëndrim publik lidhur me draft-statutin e Asociacionit. Deri në atë kohë nuk do të ketë prononcime të tjera për këtë temë”, thuhet në përgjigjen e AAK-së për Teve1.info
Më 21 tetor, diplomatët euro-amerikanë i kanë propozuar Kosovës dhe Serbisë një draft-statut të Asociaicionit, për të cilin kryeministri kosovar Albin Kurti është shprehur i gatshëm ta nënshkruajë, ndërsa presidenti serb, Aleksandar Vuçiq e ka refuzuar atë.
Ky draft-statut nuk është bërë ende publik për opinionin. /Teve1.info/
