Kryetari i Lidhjes Demokratike të Kosovës, Lumir Abdixhiku, ka reaguar për deklaratën e ministrit të Infrastrukturës, Liburn Aliu, i cili tha se “Kosova shtet i pavarur është projekt i përkohshëm”.
Abdixhiku në Facebook ka shkruar se “ç’të duhen kundërshtarët e jashtëm, kur i ke të brendshmit?”.
Derisa ka theksuar se Kosova sot udhëhiqet nga popullistë mosbesues të saj.
“Ç’të duhen kundërshtarët e jashtëm, kur i ke të brendshmit? Republika e Kosovës, sot udhëhiqet nga popullistë mosbesues të saj. Fati i projektit më të madh shqiptar, ‘Kosova shtet i pavarur e sovran’ është në duar të mohuesve të vet shtetësisë. Prandaj betimi mbi Republikë është farsë. Prandaj shkelja e Kushtetutës bëhet zakonshmëri. Sepse mosbesimi ndaj Kosovës është bindje. Këta kanë atdhe të dytë. Ne kemi vetëm Kosovën”, ka shkruar ai.
Abdixhiku tutje tha se LDK-ja si formacion i vetëm pavarësist, beson në Republikë dhe se sipas tij, Kosova është e përhershme.
“Fëmijët tanë meritojnë të besojnë në Republikë! Në shtetin që prindërit e gjyshërit e tyre nuk e kishin por ua kanë lënë me plot sakrificë. Në shtetin që në vend të mbytjes së ëndrrave e dhënies së pasigurisë u jep shpresën se një ditë do të jenë të barabartë mes popujve e shteteve euroatlantik! Prandaj dhe zgjedhja juaj është fare e lehtë. Sepse Kosova është e përhershme“, tha tutje ai.
Ndryshe, kundër kësaj deklarate reagoi sot edhe nënkryetarja e Partisë Demokratike të Kosovës, Vlora Çitaku.
Çitaku në reagimin e saj duke iu referuar ministrit Aliu, tha se “nuk mundesh me e dashtë Shqipërinë duke e urrejtë Kosovën”. Derisa tha se qeveritë janë të përkohshme, e Kosova është e përjetshme./teve1.info./
