Aleanca më e madhe ushtarake në bot, NATO do diskutojë mundësinë për një shtim të përhershëm të numrit të ushtarëve në kuadër të misionit paqeruajtës të aleancës në Kosovë.
Këtë e ka bërë të ditur sekretari i NATO-s, Jens Stoltenberg.
Diskutimi do të bëhet në takimin e ardhshëm dyditor, të ministrave të Punëve të Jashtme të shteteve të NATO-s.
“Së fundmi kemi shtuar praninë tonë në Kosovë, duke dërguar mijëra ushtarë shtesë. Tani po e shqyrtojmë nëse duhet të ketë një shtim më të përhershëm dhe nëse kemi nevojë për disa aftësi të reja të posaçme”, tha Stoltenberg.
Krerët e diplomacisë së shteteve anëtare të NATO-s do të takohen më 28 dhe 29 nëntor në selinë e aleancës në Bruksel.
NATO ka shtuar praninë e saj në Kosovë pas 24 shtatorit, kur një grup serbësh të armatosur sulmuan Policinë e Kosovës, duke vrarë rreshterin Afrim Bunjaku. Gjatë përleshjeve që pasuan po atë ditë, u vranë tre sulmues.
Gjatë vizitës në Kosovë, javën e kaluar pas takimit me presidenten Osmani, Stoltenberg paralajmëroi shtim të numrit të ushtarëve. Ai tha se nuk do të lejojnë të përsëritet një sulm si ai më 24 shtator. /teve1.info/