Në kuadër të “Ditës së Forcës”, presidentja e vendit Vjosa Osmani po merr pjesë në manifestimin qendror që po mbahet në kazermën “Adem Jashari” në Prishtinë.
Me këtë rast, Osmani tha se është krenare me ushtrinë e Kosovës dhe në bashkëpunim me institucionet e tjera do të punojnë në mënyrë që ushtarët të kenë motiv për të kontribuar për vendin, raporton teve1.info
“Si komandante supreme e kësaj ushtrie, çdokund në çdo cep të botës shihet se me sa admirim vlerësohen sukseset e kësaj ushtrie, prandaj jam jashtëzakonisht krenare për të, por njëkohësisht së bashku me institucionet e tjera do të punojmë në mënyrë që të krijohen kushte edhe shumë të volitshme qofshin ato të mirëqenies, qofshin ato të trajnimeve dhe shkollimit shtesë, qofshin ato shëndetësore, në mënyrë që çdo ushtar dhe çdo ushtare e ushtrisë tonë të ketë prosporitet dhe më shumë vullnet e motiv që të kontribuoj për ushtrinë tonë dhe vendin tonë”, deklaroi ajo.
Tutje e para e shtetit potencoi se së bashku me kryeministrin Albin Kurti, ministrin e Mbrojtjes, Ejup Maqedonci dhe komandantin e FSK-së, Bashkim Jashari, janë vazhdimisht në koordinim “në mënyrë që ushtria jonë çdo ditë e më shumë të arrijë edhe maja më të larta”. /Teve1.info/