Shkrumb e hi është bërë secila dosje brenda kësaj dhome.
E shiu po pikon nga tavani i dëmtuar.
Xhamat e thyer të dritareve kanë mbushur edhe korridorin e Institutit të Mjekësisë Ligjore.
Kjo pas një zjarri të madh që shpërtheu mëngjesin e së martës në këtë objekt në Prishtinë.
Në këtë vend ruhen edhe raportet e autopsive dhe ekzaminimet e ndryshme që kryhen nga ekspertë të këtij instituti.
E kjo është hera e dytë që ky institut është kapluar nga zjarri.
Mirëpo nga Prokuroria Themelore thonë se hetimet ende po vazhdojnë.
“Referuar pyetjeve tuaja, ju njoftojmë se aktualisht ndaj këtij rasti po vazhdon ndërmarrja e veprimeve hetimore në koordinim me institucionet relevante, andaj në këtë fazë nuk mund të japim detaje të tjera”, thuhet nga Prokuroria.
Për këtë, ministrja e Drejtësisë, Albulena Haxhiu thekson se nuk ka pasur dëmtim të arkivës së IML-së dhe mostrave.
“Rreth orës 08:00 të mëngjesit, nga drejtori i Institutit të Mjekësisë Ligjore, Ditor Haliti, jam njoftuar që dy zyra në katin e dytë në objektin e IML, janë përfshirë nga zjarri.Ekipet e zjarrëfikësve, policia, prokuroria menjëherë kanë shkuar në vendin e ngjarjes. Nga vlerësimet fillestare, nuk ka pasur djegie ose dëmtim të mbetjeve mortore, arkivës së IML dhe mostrave”, ka thënë Haxhiu.
Tëvë1 ka bërë përpjekje të kontaktojë ushtruesin e detyrës së drejtorit të këtij Instituti, Ditor Halitin, mirëpo ai nuk u është përgjigjur thirrjeve telefonike të televizionit.
