Zëvendësdrejtori i Policisë së Kosovës për Rajonin e Mitrovicës së Veriut, Veton Elshani, tha se policia në të kaluarën është nënvlerësuar edhe nga ndërkombëtarët por edhe nga vet institucionet e Kosovës, raporton teve1.info
Në emisionin “Info-Nata” në Tëvë1, Elshani tha se forcat e sigurisë nuk janë nënçmuar por nënvlerësuar, derisa shtoi se rasti i Banjskës e ka shpërfaqë profesionalizmin e Policisë.
“Unë konsideroj që edhe nga partnerët ndërkombëtarë ndoshta edhe nga institucionet tona, është nënvlerësua, nuk po e them është nënçmua, është nënvlerësua, dhe rasti Banjska e ka shpërfaqë, e ka vendos profesionalizmin e policisë. Ne e kemi një polic, e kemi një polic, Afrimin, të vrarë, rreshterin. Por nga ai moment kur e kemi pranuar informacionin që ai polic është vrarë e deri në këtë moment që po flasim, ne kemi veç lajme të mira për veprimet policore në atë vend dhe për veri të Kosovës në përgjithësi. Pse po e them këtë, sepse kur e kemi bërë ndërhyrjen pastaj është bërë rrethimi me aq mundësi sa kemi pas, në momentin që është bërë ndërhyrja dhe të bëhet një ndërhyrje e tillë është edhe fat, edhe profesionalizëm, edhe komunikim, edhe koordinim mes njësive në mënyrë që çdo gjë të shkoj ashtu siç ka shku”, tha Elshani.
Ai tha se qëllimi nuk ka qenë të vritet asnjë polic, por të merret territori dhe të zbatohet ligji.
“Nuk ka qenë qëllimi ynë me i vra 30 vetë, nuk ka qenë qëllimi ynë me e vra asnjë, qëllimi Policisë së Kosovës ka qenë me marrë territorin dhe me zbatu ligjin, që në fakt ka ndodh. Tash gjatë ati procesi janë vrarë 3 perona dhe dy të tjerë i kemi arrestu, dmth janë zënë të gjallë. Mandej ka shumë prova materiale shumë veprime tjera të cilat nuk kemi mundësi me i diskutu këtu sepse janë edhe pjesë e hetimit dhe prokurori mandej për mi vendos këto prova para gjykatës, por ju e keni parë me çfarë armatimi kemi pas të bëjmë, por veprimet tona kanë qenë të menjëhershme dhe veprimet e menjëhershme të policisë së rendit dhe policisë kufitare, në fakt policia kufitare ka qenë e para që ka qenë aty, dhe mandej policia e rendit, këto veprimet e para të policëve të parë që kanë qenë aty, e kanë sjellë situatën ku është edhe sot”, tha Elshani.
Ndërsa, i pyetur nëse ka mundur të ndalohen serbët që u panë në video-xhirime duke ikur maleve, Elshani tha se është bërë më e mira e mundshme.
“Unë them që plan perfekt nuk ka por perfekt do të ishte që ata t’i qojnë duart përpjetë dhe të kthehen. Ka qenë më e mira e mundshme që është bërë, për shkak se është terren i thyeshëm, ka qenë më e mira e mundshme që është bërë për atë moment, nuk ka pas asnjë lëshim nga ana e jonë që me thënë po e lirojmë njëfarë zone që ata me ikë. Konsiderojmë të gjitha ose shumicën e armatimit që këta njerëz i kanë bartë, ne i kemi gjet rrugës. Ata kanë pas humbje të njerëzve, edhe në teknikë të tyre, e kanë humbë dhe orientimin e tyre ata njerëz. Aty për neve është një arritje e qëllimit me dëme minimale, konsideroj që kjo do të vendoset edhe në akademi të policisë për trajnime të ndryshme, do të jetë mësim edhe për policitë në rajon”, u shpreh Elshani.
