Zëdhënësja e Lidhjes Demokratike të Kosovës, Sibel Halimi, ka reaguar pas deklaratës së kryeministrit të Kosovës, Albin Kurti, i cili numëroi sukseset në politikën e jashtme.
Halimi ka thënë se Kurti duhet të punojë për t’i hequr sanksionet e vendosura nga faktori ndërkombëtar, e jo të lavdërohet për sukseset në diplomaci.
“Është kundër logjikës të lavdërohesh për suksese në diplomaci, në një kohë kur Kosova është nën masa shtrënguese, pikërisht nga aleatët e saj. E kryeministri Kurti, në vend se të lëvizë në kahun e duhur për t’ia hequr sanksionet që i prekin drejtpërdrejt qytetarët kosovarë, ai shfaqet me krekosje! Nëse i kujtojmë gafat e panumërta të zëvendëskryeministres Gërvalla në deklaratat e saj të pamatura dhe të dëmshme për vendin, atëherë mund të konkludojmë se diplomacia kosovare është në qorrsokak”, ka shkruar ajo në Facebook.
Halimi ka vlerësuar se është absurditet të cilësohet si sukses aplikimi në organizata ndërkombëtare.
“Në dy vite e gjysmë mandat, nuk patëm asnjë njohje, asnjë anëtarësim në organizata ndërkombëtare. E ta cilësosh aplikimin për sukses është absurditet”, ka thënë ajo./teve1.info/
