Tre ndeshje përmbyllin xhiron e 13 të Superligës së Kosovës në futboll, që zhvillohen këtë të dielë nga ora 13:00, respektivisht një ndeshje nga ora 19:00.
Në stadiumin “18 Qershori” në Klinë, Dukagjini pret Dritën. Jeshilët do të kërkojnë fitoren si vendas ndaj Dritës, e cila ka dy ndeshje që nuk di për fitore.
Ndonëse jeshilët janë vendas, nuk kanë bilanc të mirë si pritës ndaj Dritës. Në pesë ndeshje të ndërsjellta në Klinë, Dukagjini ka marrë vetëm një fitore, dy barazime dhe ka dy humbje ndaj Dritës në “18 Qershori”. Rezultati më i thellë në këto ballafaqime është ai i 30 gushtit të vitit 2019, me Dritën që atë kohë fitonte 0:4. Mirëpo tani kanë ndryshuar rrjedhat dhe mbetët të shihet se cila skuadër do të dalë fituese, pavarësisht që Drita mbanë dozën e favoritit në letër.
Përballje e fortë do të luhet edhe në “Sami Kelmendi” në Lipjan, me Fushë Kosovën që luan si vendas i Lirisë. Të dy skuadrat zënë vendet e fundit në tabelë dhe të dy ekipet do të kërkojnë fitoren për të poentuar pikët, për tu bërë presion skuadrave që gjenden me sipër në renditjen klasifikuese.
Këtë edicion, në ndeshjen e parë të ndërsjelltë Liria e ka fituar takimin me rezultatin 2:1 në stadiumin “Përparim Thaçi” në Prizren. Të dy këto ndeshje do të luhen nga ora 13:00, derisa në ora 19:00 do të zhvillohet derbi rajonal nën ndriçimin e reflektorëve në stadiumin “Fadil Vokrri” në Prishtinë, me Prishtinën që pret Llapin.
Prishtina në këtë takim vije pas disfatës nga Malisheva dhe kërkon këndelljen në kryeqytet, derisa Llapi nuk di për fitore në tre ndeshjet e fundit dhe synon të rikthehet te rezultatet pozitive.
Në ndeshjen e parë këtë edicion dy skuadrat janë ndarë të barabarta pa gola në stadiumin “Zahir Pajaziti” në Podujevë, derisa në “Fadil Vokrri” në Superligë këto dy ekipe janë ndeshur 15 herë, hiqe këto ndeshjet për Kupë dhe Superkupë. Prishtina ka bilanc pozitivë, derisa ka marrë dhjetë fitore, me Llapin aë ka arritur vetëm tri në Prishtinë dhe dy herë të tjera janë ndarë baraz.
Mirëpo tani ndryshe nga herë të tjera gjërat janë ndryshuar dhe tani do të pritet një sfidë e barabartë, pasi që të dy skuadrat kanë dozë favoritit të barabartë.