Trupat izraelite dhe autoblindat kanë hyrë më thellë në veri të Rripit të Gazës më 30 tetor, duke arritur në zonat e banuara. Ndërkaq, Kombet e Bashkuara dhe stafi shëndetësor kanë paralajmëruar se sulmet ajrore po godasin më afër spitaleve, ku dhjetëra mijëra palestinezë janë strehuar dhe ku po trajtohen mijëra të plagosur.
Intensifikimi i operacioneve tokësore u bë një ditë pasi 33 kamionë me ushqim, ilaçe dhe furnizime të tjera hynë në Gazë nga Egjipti.
Kjo është ndihma më e madhe humanitare që është dërguar në Rripin e Gazës që kur ka nisur lufta ndërmjet Izraelit dhe militantëve palestinezë të Hamasit. Por, punëtorët e ndihmës thanë të hënën se megjithatë ndihma nuk është e mjaftueshme për nevojat në Gazë, që është nën rrethim për javë të tëra.
Ministria e Shëndetësisë në Gazë tha se numri i palestinezëve të vrarë ka kaluar shifrën prej 8.000. Kjo ministri tha se shumica e viktimave janë gra dhe të mitur.
Kryeministri izraelit, Benjamin Netanyahu, paralajmëroi se ka nisur “faza e dytë” e luftës, pasi Hamasi nisi sulmet ndaj Izraelit më 7 tetor, duke vrarë më shumë se 1.400 persona, shumica civilë.
Në një video të publikuar të hënën nga ushtria izraelite shiheshin autoblinda duke lëvizur në mesin e ndërtesave në veri të Gazës dhe ushtarët duke u vendosur në pozicione brenda një shtëpie. Lokacioni i saktë se ku është incizuar videoja nuk dihet, por pamjet e publikuara të shtunën nga ushtria tregonin trupat duke ecur nëpër zona të zbrazura afër kufirit në veri të Gazës.
Ushtria izraelite tha të hënën se gjatë natës trupat e saj kanë vrarë dhjetëra militantë që sulmuan nga brendësia e ndërtesave dhe tuneleve, duke shtuar se sulmet ajrore kanë shkatërruar një ndërtesë që po e përdorte Hamasi. Po ashtu, ushtria tha se në ditët e fundit ka shënjestruar mbi 600 caqe militante, përfshirë depo të armëve dhe pozicione të raketahedhësve. Këto pretendime nuk kanë mundur të konfirmohen në mënyrë të pavarur.
Krahu ushtarak i Hamasit tha se militantët janë përleshur me armë të vogla dhe raketa kundërtanke me trupat izraelite që hynë në veriperëndim të Rripit të Gazës. Militantët palestinezë kanë vazhduar të hedhin raketa në Izrael, përfshirë një drejt Tel Avivit.
Linjat e komunikimit janë rikthyer për shumicën e 2.3 milionë banorëve të Gazës të dielën, pasi për më shumë se një ditë ata mbetën pa shërbime të telekomunikacionit dhe internetit, pas bombardimeve të ashpra.
Izraeli tha se shumica e banorëve të Gazës i janë bindur urdhrit të tij për t’u larguar në pjesën jugore të territorit të rrethuar, por qindra mijëra vazhdojnë të jenë në veri, pjesërisht për shkak se Izraeli po ashtu po sulmon në zonat e ashtuquajtura të sigurta.
Më shumë se 1.4 milion persona në Gazë janë larguar nga shtëpitë e tyre që kur ka nisur lufta.
Rrethimi i Gazës nga Izraeli ka bërë që infrastruktura në këtë territor të jetë buzë kolapsit. Për javë të tëra, Rripi i Gazës nuk ka energji elektrike dhe spitalet po kanë vështirësi që të operojnë, duke përdorur gjeneratorë për të mbajtur në punë inkubatorët dhe pajisjet kryesore.
Kombet e Bashkuara thanë, po ashtu, se në Rripin e Gazës nuk ka furnizime të mjaftueshme me ujë.
SHBA-ja i ka kërkuar Izraelit që menjëherë të rrisë hyrjen e ndihmave humanitare për banorët në Gazë dhe Izraeli ka thënë se shumë shpejt do të lejojë që në territor të hyjë më shumë ndihmë, pa specifikuar se sa.
Elad Goren, kreu i çështjeve civile në COGAT – trup i mbrojtjes izraelite që është përgjegjës për çështjet e civilëve palestinezë – tha po ashtu se Izraeli ka hapur dy linja të ujit në jugun e Gazës. Këto pretendime nuk kanë mundur të konfirmohen në mënyrë të pavarur.
Ndërkaq, është rritur rreziku për spitalet e stërmbushura në veri të Gazës. Kombet e Bashkuara thanë më 30 tetor se ka pasur sulme afër spitalit Shifa në Qytetin e Gazës dhe Al-Kuds në veri të Gazës.
Të dhjetë spitalet që ende po punojnë në veri të Gazës kanë marrë urdhër për evakuim ditëve të fundit, tha OKB-ja. Sipas OKB-së, përveç pacientëve dhe stafit, afër 117.000 persona të zhvendosur janë në këto spitale.
Banorët kanë raportuar të dielën për sulme ajrore afër spitalit Shifa, që është spitali më i madh në Rripin e Gazës. Izraeli akuzoi Hamasin se ka një qendër komanduese poshtë spitalit, por nuk dha dëshmi për këtë pretendim. Hamasi i mohoi këto akuza, shkruan REL.
Sulmet ajrore kanë goditur 50 metra larg spitalit Al-Kuds, pasi autoritetet e spitalit të dielën pranuan dy thirrje nga autoritetet izraelite për evakuim, tha Gjysmëhëna e Kuqe palestineze. Sipas kësaj organizate, 14.000 persona po strehohen në këtë spital.
Ndërkaq, luftimet midis Izraelit dhe Hamasit kanë rritur shqetësimet se konflikti mund të përhapet në rajon. Izraeli dhe grupi militant Hezbollah në Liban janë përleshur përgjatë kufirit verior izraelit.
Po ashtu të hënën, ushtria izraelite tha se avionët e saj kanë sulmuar infrastrukturën ushtarake në Siri pasi nga ajo pjesë janë hedhur raketa në territorin e Izraelit.
Afër 250.000 izraelitë janë evakuuar nga shtëpitë e tyre për shkak të dhunës përgjatë kufirit me Gazën dhe në kufirin verior me Libanin, ka thënë ushtria izraelite.
