Deputeti i Lëvizjes Vetëvendosje, Dimal Basha, ka deklaruar se minatorët në Trepçë kanë pagat më të larta në rajon.
Basha, ka deklaruar se paga mesatare e minatorëve sillet rreth 1,250 euro.
“Pas krejt propagandës, ka rëndësi qytetarët me ditë që Trepça asnjëherë nuk ka pasur më shumë mbështetje se sa me Qeverinë Kurti! Për dy vite ka pasur mbi 20 milion euro mbështetje nga qeveria! Gjithashtu, minatorët në Trepçë kanë pagat më të larta në rajon, ku paga mesatare sillet 1,250 euro, derisa në Maqedoni paguhen 600 euro e në Shqipëri 585 euro!”, ka shkruar Basha në Facebook.
Por, për këtë mesatare nënkryetari i Sindikatës së minatorëve të Trepçës, Destan Kërleshi, ka thënë se nuk është e vërtetë.
Kërleshi, ka thënë se paga mesatare bazë e minatorëve është 740 euro.
“Jo, mesatarja është 740 euro rroga bazë. Përkatësisht, unë jam inxhinier në makineri dhe rroga e saktë për muajin e kaluar edhe pse e kemi marrë me dy pjesë është 840 euro, pra si inxhinier. Ndërsa, stafi tjetër 740-750. Por, rroga mesatare bazë është 740 euro, aty llogaritet edhe puna shtesë gjë që më bën për të qeshur. Ndërsa, paga më e lartë e kryeshefit është rreth 3 mijë me familjarë që ka aty ngritët në 4 mijë euro e kryeshefit ekzekutiv që ne po kërkojmë ta shkarkojmë”, tha ai në emisionin “Ditari” në Tëvë1./teve1.info/
