Kryeministri i vendit, Albin Kurti, ka folur pas takimit që ka pasur dje në Bruksel me pesëshen evropiane, ku tha se ka kërkuar ndëshkimin dhe sanksionimin e Serbisë.
Ai ka thënë se drafti për vetëmenaxhim që e kanë sjellë emisarët është shkruar me kujdes ndaj shkronjës dhe strukturës së Kushtetutës dhe ligjeve të Republikës së Kosovës dhe sipas tij, nëse do të nënshkruhej aty parashihet që ta kontrollonte Gjykata Kushtetuese, menjëherë.
Kurti ka thënë se Serbia refuzoi sërish ta nënshkruante marrëveshjen.
“Republika e Kosovës është e interesuar për normalizim të marrëdhënieve me Serbinë dhe për njohje reciproke. Në këtë drejtim unë e rikujtova se më 27 shkurt në Bruksel e kemi pranuar Marrëveshjen Bazike…dhe aneksin e zbatimit të Ohërit më 18 mars…Në të dyja rastet edhe më 27 shkurt në Bruksel edhe më 18 mars në Ohër pala serbe, përkatësisht presidenti i Serbisë ka refuzuar që të nënshkruajë marrëveshjen, ndonëse ka thënë se e pranon marrëveshjen dhe është dakord me përmbajtjen dhe tekstin e saj. Unë nënshkrimin e marrëveshjes e ofrova edhe në Samitin e Procesit të Berlinit në Tiranë, ku Serbia e cila përfaqësohej nga kryeministrja e saj, gjithashtu refuzojë, sikurse presidenti i Serbisë.
Ndërsa në takimin e 21 tetor nga emisarët amerikanë dhe evropianë na është thënë se drafti për vetëmenaxhim që e kanë sjellë është shkruar me kujdes ndaj shkronjës dhe strukturës se Kushtetutës dhe ligjeve të Republikës së Kosovës dhe nëse do të nënshkruhej aty parashihet që ta kontrollonte Gjykata Kushtetuese menjëherë, pra që kjo Gjykatë jep vlerësimin e saj për kushtetutshmërinë e këtij propozimi si përgjigje”, ka thënë Kurti në konferencë për media.
Tutje, Kurti tha se e respektojnë kërkesën e pesë emisarëve euro-amerikanë që të mos flasin për planin e ri që është propozuar më 21 tetor.
“Sa i përket këtij propozimi ne e respektojmë kërkesën e pesë emisarëve derisa të na kërkohet që të mos flasim konkretisht për të. Por, më e rëndësishmja është që emisarët kanë deklaruar që e kanë shkruar me kujdes duke parë pasur parasysh Kushtetutën dhe ligjin dhe se përgjigjen për çfarëdo dilema mund ta jap Gjykata Kushtetuese”, tha Kurti në një konferencë për media, raporton teve1.info
Tutje, kryeministri tha se komuniteti serb në Kosovë nuk duhet ta harrojë se sa shumë ka bërë Kosova për ta.
“Por, për bindjen tonë të fuqishme vetëmenaxhimi i komunitetit serb në Kosovë nuk do të duhej asnjëherë ta harrojë se sa shumë tashmë ka bërë Republika e Kosovës për serbët në Kosovë, të drejta të cilat janë të pashembullta edhe në vetë Evropën, ndërkohë që kemi dëgjuar shpesh se flitet për modele evropiane të zgjidhjes”, deklaroi ai./teve1.info/
