Muhamed Kajolli, doktor i shkencave politike dhe njohës i rrethanave në Lindjen e Mesme ka folur lidhur me luftën siç e ka quajtur ai ndërmjet Hamasit dhe Izraelit dhe mundësinë e përhapjes së saj në pjesën tjetër të rajonit.
Ai ka uruar që ndonjë shtet arab ose jo arab të mos përfshihet në këtë luftë.
“Uroj të mos ketë ndonjë ndërhyrje të një shteti arab ose jo arab të përfshihet në luftë mes Izraelit dhe Hamasit” ka thënë ai në emisionin InfoNata në Tëvë 1.
Kajolli ka thënë se problemi ndërmjet Izraelit dhe Palestinës, nuk është çështje mes dy shteteve, por dy ideologjive.
“Kemi këtu një problem që nuk mund të sqarohet. Këtu nuk kemi të bëjmë me dy shtete, luftë mes dy shteteve, por këtu kemi të bëjmë mes dy ideologjive. Pikë së pari, Izraeli nuk është shtet, për tre arsye. Nuk ka kushtetutë, një shtet që nuk ka kushtetutë, nuk mund të quhet shtet. Pastaj, është shtet që nuk ka kufi të pranuar ndërkombëtarisht, ajo nuk e dëshiron një gjë të tillë. Pastaj, definicioni i popullit, kush jeton në Izrael – nuk është e definuar. Këto tre elemente e shtetit, Izraeli nuk e ka asnjërën, dhe nuk do që t’i ketë”, ka thënë ai.
Kajolli, ka folur edhe për dallimet ndërmjet Hamasit dhe shtetit të Palestinës.
Sipas, tij populli i gazës nuk e njeh për president Mohamed Abazin. Madje ai thotë se presidentit aktual i Palestinës është njëri i papërfillshëm në botën arabe.
“Populli i Gazës nuk e njeh Abasin për president. Ai është një njeri i cili e shikon veten, ministrat që i ka dhe kaq, është një zyre e papërfillshme nga gjithë arabët”, tha ai.
Që nga sulmet e grupit militant palestinez, Hamas, ndaj Izraelit më 7 tetor, Izraeli ka kryer sulme të vazhdueshme në Rripin e Gazës. Që nga shpërthimi i dhunës, mijëra persona janë vrarë në të dyja anët e konfliktit.
