Ministria e Punëve të Jashtme ka reaguar në lidhje me deklaratat e presidentit të Francës, Emmanuel Macron, për sa i përket çështjes së vizave, duke thënë se “duket të jetë interpretuar gabimisht”.
Mirëpo, në një përgjigje për teve1.info, Zëvendësministri i Punëve të Jashtme dhe Diasporës, Kreshnik Ahmeti, tha se institucionet e Kosovës deri më tani nuk kanë pranuar asnjë vendim zyrtar për çështjen e liberalizimit të vizave.
“Sa i përket pyetjeve tuaja, lidhur me deklaratën e bërë sot nga Presidenti i Francës, z. Macron, e cila duket madje edhe të jetë interpretuar gabimisht, ju njoftojmë se institucionet e Republikës së Kosovës deri më tani nuk kanë pranuar asnjë vendim tjetër zyrtar për çështjen e liberalizimit të vizave. Vendimet për miratim, pezullim apo shtyrje të liberalizimit të vizave merren në nivel të Bashkimit Evropian, e jo të shteteve anëtare. Procedurat e tilla i kanë afatet e caktuara kohore dhe vendimet merren me shumicën e paraparë të votave.”, thuhet në përgjigjen e Ministrisë.
Gjatë ditës u raportua se presidenti i Emmanuel Macron, kishte deklaruar se “Franca e ka pezulluar liberalizimin e vizave për Kosovë”.
“Presidenti ka folur për tensionet mes Serbisë dhe Kosovës. Ai tha se cilat ishin kërkesat tona. Në këtë kontekst dhe duke marrë parasysh bllokadën e Prishtinës, presidenti vlerësoi se çështja e liberalizimit të vizave mbetet e hapur. Për më tepër, është një proces teknik dhe një diskutim që duhet bërë me partnerët tanë evropianë”, sqaroi zyra e Emmanuel Macron.
