Kryeministri Albin Kurti, pati premtuar një qasje më ndryshe me serbët lokalë. Ai kishte planifikuar që të zhvillonte një dialog të brendshëm me ta.
Megjithatë, deri më tani një dialog i tillë ka munguar mes shefit të ekzekutivit dhe komunitetit serb.
Profesori Abit Hoxha, konsideron se qeverisë aktuale i ka munguar një strategji për integrimin e serbëve.
Kurse, diplomati holandez Robert Bosch, e sheh Beogradin si fajtorin kryesor për mos-integrimin e serbëve në shoqërinë kosovare.
Bosch thotë se komuniteti serb në Kosovë është nën presion të vazhdueshëm nga forcat radikale të kontrolluara nga vet presidenti serb, Aleksandar Vuçiq.
“Serbët lokal në veri janë viktima të forcave radikale serbe dhe kjo e bënë shumë të vështirë integrimin e tyre. Disa prej tyre që kanë synuar të integrohen më shumë janë ballafaquar me probleme dhe presione nga radikalët. Prandaj konsideroj që serbët lokal janë duke përjetuar një situatë shumë të vështirë dhe normalisht se ata kanë frikë. Vetëm shikojeni se çfarë ka ndodhur me serbët që ishin pjesëtar të policisë së Kosovës, për shkak të presioneve nga Beogradi ata u detyruan të japin dorëheqje. Nuk ka asnjë dyshim që Lista Serbe është instrument politik i presidentit serb, Aleksandar Vuçiq”, u shpreh Robert Bosch.
Në anën tjetër, politikani serb Boban Bogdanoviq, e sheh si të domosdoshme që kryeministri i Kosovës, Albin Kurti, të hap një zyrë në pjesën veriore të vendit dhe të fillojë të diskutojë hapur me serbët lokal.
“Është e pamundur të zhvillosh dialog të brendshëm me serbët lokal për shkak të ndikimit negativ të Beogradit. Fatkeqësisht serbët lokal në veri janë pa përfaqësues politik, Lista Serbe nuk ka bërë asgjë për ta, serbët lokal vetëm se janë instrumentalizuar nga kjo parti. Është e domosdoshme që tani kryeministri Albin Kurti të hapë një zyre në veriun e Kosovës dhe të zhvillojë një komunikim të sinqertë me serbët lokal. Ai duhet të thërras serbët dhe të flas me ta për problemet me të cilat po ballafaqohen, besoj se kjo do të ishte zgjidhja më e mirë”, tha Boban Bogdanoviq.
Në vitin e kaluar gjatë muajit nëntor serbët në Kosovë vendosën t’i braktisin institucionet e vendit.
Një e pjesë e madhe e serbëve deklaruan se ishin të detyruar të japin dorëheqje për shkak të presionit të Listës Serbe.