Në emisionin “Këndi i Debatit” në Tëvë 1, Kamberi theksoi se nuk mund të jenë bashkëpunues me Serbinë, sepse bashkëpunimi duhet të jetë reciprok.
“Në aspekt të veprimit tonë politik ne jemi munduar të jemi pragmatik dhe të jemi bashkëpunues në raport me Beogradin, gjithmonë me ndihmën e faktorit ndërkombëtar, por ti nuk mund te jesh bashkëpunues, sepse bashkëpunimi është raport reciprok, derisa pala tjetër nuk dëshiron të të trajtojë ty si partner të barabartë. Dhe ne kërkojmë partneritet për problemet që i kanë shqiptarët në Luginën e Preshevës”, është shprehur Kamberi.
Ai ka shtuar se nuk janë të interesuar për ndarjen e posteve me qeverinë serbe, duke treguar edhe synimet që kanë.
“Ne nuk jemi të interesuar për ndarjen e posteve qeveritare sepse jemi një përqind në nivel të Serbisë. Nuk kemi ndoshta edhe kuadër për më shumë. Ajo që është synim i joni strategjik është që numri i shqiptarëve në instiucionet e shtetit në Polici, në Gjyqësor, në Inspeksionet shtetërore, në Doganë, në Shërbimin e të ardhurave, në të gjitha institucionet shtetërore që veprojnë për komunat tona, numri i shiqptarëve duhet të jetë i reprezentuar proporcionalisht me strukturën e popullsisë”, tha Kamberi. /Teve1.info/
