Presidenti i Shqipërisë, Bajram Begaj, zhvilloi një takim me Ursula von der Leyen, Presidenten e Komisionit Evropian.
Ai duke folur për situatën e sigurisë në Evropë dhe Ballkanin Perëndimor, ka thënë se “Shqipëria vazhdon të mbështesë e të jetë e linjëzuar me politikat e jashtme dhe ato të sigurisë së BE-së.”
Begaj siç thuhet në komunikatën e Presidencës, ka përshëndetur qëndrimin e BE-së për sulmin terrorist nga grupi i armatosur serb në veri të Kosovës duke kërkuar që ndëshkohet ky akt.
“Presidenti Begaj shfrytëzoi këtë takim për të përshëndetur qëndrimet e Bashkimit Evropian për stabilizimin e paqes në rajon duke kërkuar që të ndëshkohet sulmi terrorist serb i 24 shtatorit ndaj një vendi sovran siç është Kosova dhe destabilizim të të gjithë rajonit”, thuhet në komunikatë.
Duke e cilësuar si ngjarje historike mbajtjen e Samitit të liderëve të Procesit të Berlinit për herë të parë në një vend të Ballkanit Perëndimor të martën në Tiranë, Presidenti Begaj u shpreh se është besimplotë se ky samit do të nxisë marrëdhënie më të mira midis vendeve të Ballkanit Perëndimor dhe se do të ndërtojë shinat e duhura për krijimin e një tregu ekonomik të zonës, shina që do zgjaten më pas drejt tregut të përbashkët të Bashkimit Evropian.
