Së shpejti pritet që në shtëpinë e tij të kthehet ish kreu i OVL UÇK-së, Hysni Gucati.
Familjes dhe bashkëpunëtorëve të Gucatit, mbrojtësit e tij ua kanë konfirmuar se ai është liruar me kusht nga Gjykata Speciale.
Familjarët prapa kamerës kanë treguar se me shumë emocione e kanë marrë këtë lajm, derisa me padurim presin ditën kur do të vijë në shtëpi Hysni Gucati.
I pari që e kumtoi këtë lajm ishte, Faton Klinaku, ushtrues detyre i OVL – UÇK-së.
“Gucati është liruar. Unë dje e mora vesh. Nuk e di formën. Për këtë duhet parë vendimin. Ajo që di është se Haradinaj nuk është liruar”.
E këtë lajm e mirëpriten edhe bashkëluftëtarët e Gucatit.
Megjithatë një konfirmim zyrtar nuk e ka bërë ende Specialja.
“Nëse dhe kur nxirret një vendim publik për këtë çështje, ai do të jetë i disponueshëm në faqen e internetit të Dhomave të Specializuara”, tha zëdhënësi i Dhomave të Specializuara, Michael Doyle.
Ndërkohë, kërkesa për lirim me kusht e Nasim Haradinaj është refuzuar, e që pritet rishikimi i saj pas dy muajve.
Për akuzat ndërhyrje në drejtësi, Gucati e Haradinaj u arrestuan në shtator të vitit 2020, derisa në maj të vitit 2022 u shpallën fajtor, duke u dënuar me nga katër vjet e gjysmë burgim.
E në fillim të këtij viti, Gjykata e Apelit ua uli këtë dënim për tre muaj.
