Ballkani ka reaguar në lidhje me sulmet verbale dhe fizike, të cilat i janë bërë trajnerit Ilir Daja në ndeshjen kundër Prishtinës, të luajtur të dielën mbrëma në stadiumin “Fadil Vokrri” që përfundoi 1:1.
Në reagimin e Ballkanit thuhet se trajneri Daja ka qenë cak i vazhdueshëm i këtyre sulmeve nga persona që në stadium nuk ishin për të shikuar ndeshje futboll, por për qëllime tjera josportive.
Ballkani ka zbuluar se vëllai i njërit prej zyrtarëve të klubit të Prishtinës, e kishte gjuajtur trajnerin Daja me shishe në fund të pjesës së parë. Ai së bashku me disa persona tjerë, thuhet se ka qëndruar mbi bankinën e Ballkanit, duke ofenduar e kërcënuar si trajnerin Daja ashtu edhe stafin teknik të Ballkanit.
“Fc Ballkani është i indinjuar nga kjo ngjarje, andaj kërkon nga organet kompetente si brenda ashtu edhe jashtë Federatës, që ta trajtojnë me seriozitet këtë situatë sepse futbollin të cilin po mundohemi ta dërgojmë sa më shumë përpara, gjërat e tilla e kthejnë prapa. Puna e madhe e Fc Ballkanit, përfshi trajnerin Daja dhe futbollistët tanë, i ka sjellur dobi krejt ekipeve të Superligës, në këtë rast edhe vetë Prishtinës, andaj është e pakuptueshme që të lejohen lëshime të tilla”, ka shkruar Ballkani në reagim ndër të tjera.
