Janë bërë më shumë se një muaj nga fillimi i vitit të ri shkollor. Por ende nuk janë pajisur të gjithë nxënësit me libra.
Ministria e Arsimit ka njoftuar se janë subvencionuar shumica e aplikantëve.
“Nga grupi punues i MASHT dhe MFPT janë verifikuar dhe proceduar pagesat e 97% të aplikantëve dhe ky proces është duke u përmbyllur me sukses. Po ashtu, i kemi zgjidhur rastet për furnizim me tekste shkollore për komunitetet jo shumicë dhe grupet e nxënësve me kujdestari ligjore”, është bërë e ditur nga MASHTI.
Por jo të gjithë prindërit patën qasje në E-Kosova.
Në shkollën fillore “Emin Duraku” në Prishtinë, rreth 20 nxënës të komuniteteve jo-shumicë ende nuk po arrijnë të pajisen me libra.
Krahas vështirësisë së qasjes në platformën E-Kosova, prindërit e tyre po përballen edhe me probleme të tjera.
Andaj edhe furnizimi me libra po del të jetë i pamundur për këta nxënës.
“Shqetësues mbetet, ne kemi nxënës të komuniteteve që vijnë edhe nga Shqipëria edhe nga komunitet pakicë në Kosovë ku për shkak të mos qasjes në E-Kosova apo që janë në procedurë të marrjes së shtetësisë, kanë problem me furnizim. Është numër afër 20 nxënës ku po kanë problem në qasjen E-Kosova, ku nuk kanë ndoshta fare account që me e ndjek procesin”, thotë drejtori i shkollës “Emin Duraku” në Prishtinë, Visar Osmani.
Megjithatë Instituti EdGuard vlerëson që mësimdhënësit në këto raste nuk duhet të kufizohen vetëm në tekstet shkollore.
“Për ato lëndë të cilat ka pasur mungesë të teksteve shkollore e që kjo në dijeninë tonë është shumë minimale si numër i teksteve të munguara për ato shpresojmë shumë që kemi pasë mësimdhënës mjaftueshëm të përgatitur që mos me u kufizu veç në tekst shkollor”, bën të ditur Rinor Qehaja nga Instituti EdGuard.
Por përveç kësaj, në rrjetet sociale ka pasur ankesa të shumta nga prindërit për subvencionim për librat.
Ndërsa për të tjerët që iu procedua pagesa, thuhet se ka pasur edhe keqpërdorime.
“Ka edhe asi raste kur kanë tentu me i kërku librat e vjetër në mënyrë që mos me i pagu librat e reja. Por përzgjedhja është bërë nga mësimdhënësit e lëndës ku nuk është e drejtë e askujt për me ia imponu arsimtarit”, shtoi Osmani.
Ministria e Arsimit, Shkencës, Teknologjisë dhe Inovacionit (MAShTI), deri në fund të muajit shtator njofton se në platformën e-Kosova janë pranuar 191 mijë e 483 aplikime.
