Deputeti i Kuvendit të Kosovës nga radhët e Lëvizjes Vetëvendosje, Enver Dugolli, tha se derisa Serbia nuk e ndërron qasjen ndaj Republikës së Kosovës, gjithmonë ekziston rreziku për sulme të reja, raporton teve1.info
Në emisionin “Info-Nata” në Tëvë1, Dugolli tha se për këtë arsye, institucionet e Republikës së Kosovës po punojnë në ngritjen e kapaciteteve të sigurisë, në mënyrë që Kosova mos të jetë e befasuar nga sulmet e mundshme në të ardhmen.
“Rreziku ekziston gjithmonë derisa qasja e Serbisë nuk ndërron karshi Kosovës. Këtë duhet ta kuptojnë të gjithë e besoj më së shumti e dimë, e ndjejmë ne qytetarët e Kosovës dhe institucionet e Republikës të cilat po punojnë në atë drejtim që të mos jenë të befasuara me asgjë. Pra, po punojnë në drejtimin e forcimit të kapaciteteve të shtetit që përballet me situata të tilla”, tha Dgolli.
Megjithatë, ai shtoi se në këtë drejtim duhet të ketë reagim më të ashpër të bashkësisë ndërkombëtare.
“Mirëpo, në këtë rrafsh dua të theksoj edhe diçka, që këtu meriton e do të duhej e ne po shpresojmë që do të ndodh kështu të jetë një reagim më i ashpër i Bashkimit Evropian dhe Shteteve të Bashkuara të Amerikës, pra bashkësisë ndërkombëtare karshi një agresioni të hapur të Serbisë ndaj Kosovës. Çdo vonesë apo çdo situatë tjetër e cila nuk do ta ndëshkonte, nuk do ta gjykonte me masa sanksionuese Serbinë, është inkurajim për ndonjë sulm tjetër”, u shpreh Dugolli.
Ai u shpreh optimist se për një periudhë të shkurtër siç tha BE dhe SHBA do ta thonë fjalën e vet të fundit konform të gjeturave që ata i kanë dhe do t’i kenë edhe në ditët në vijim për atë që ndodhi më 24 shtator.
